די אמעריקאנער אידנטום גרייט זיך צו אנטפאנגען בהדרת כבוד התורה דעם עהרנפולן גאסט פון ארץ ישראל, הגאון הגדול רבי משה הלל הירש שליט"א ראש ישיבת סלאבאדקע, וועלכער נעמט אונטער א לענגערע רייזע קיין אמעריקע אויפצוטרייבן פאנטאסטישע געלטער לטובת די בארימטע סלאבאדקע ישיבה, שטייענדיג אינעם שנת יובל השמונים זינט די ישיבה איז געגרינדעט געווארן.
אין יאר תש"ז האבן אנגעהויבן שיינען די ערשטע ליכטיגקייטן פון די בארימטע סלאבאדקע ישיבה אין ארץ ישראל, אין אנדענק פון די היסטארישע ישיבה אין שטאט סלאבאדקע אין דער אלטער היים. זינט יענעם טאג פאר גאנצע אכציג יאר טוט די קול התורה שטייגן מער און מער, מיט צענדליגע טויזענטער תלמידים וואס האבן זיך שוין משלים געווען דארט בין כותלי הישיבה אין לויף פון די יארן.
דער ראש ישיבה שליט"א וועלכער טראגט אויף זיינע פלייצעס דעם עול החזקת הישיבה, וועט אונטערנעמען א לענגערע נסיעה קיין אמעריקע אויפצוטרייבן די נויטיגע געלטער צו קענען ממשיך זיין דעם קול התורה, איבערהויפט אין די יעצטיגע שווערע תקופה ווען אחינו בני ישראל בארץ הקודש ליידן זיך צוזאם ביטער שווער צוליב די גזירת הגיוס, און עס פאדערט מסירת נפש צו קענען אנגיין מיט לימוד התורה בהתמדה.
מיטוואך פרשת תולדות ראש חודש כסלו וועט דער ראש ישיבה גרייכן די אמעריקאנער באדן, און פארוויילן דאהי פאר צוועלף טעג, באזוכנדיג אין מערערע שטעט בבתי נגידים ושועים אויף מסיבות און באנקעטן. צום הויכפונקט וועט געפראוועט ווערן א געהויבענע שבת "מלכתא" אינאיינעם מיט די תלמידים ויוצאי הישיבה נדיבי לב תומכי תורה, וואו מען וועט האבן די געלעגנהייט ליהנות מזיו אורו הגדול.
