מיט שווערע געמיטער ווערט אויפגענומען די ביטערע בשורה פון לאנדאן הבירה, איבער די פטירה פון הרב החסיד המפואר ר' שמואל בנימין אליעזר בערגער ז"ל, באקאנטער תומך תורה ולומדיה און פון די ראשי הקהילה אין קהל יטב לב ד'סאטמאר אין לאנדאן, וועלכער איז נפטר געווארן אין בליענדן עלטער פון זיבעציג יאר.
הנגיד החסיד ר' שמואל בנימין אליעזר ע"ה איז געווען א זון פון הנגיד החסיד ר' שלום צבי בערגער ז"ל, און א אייניקל פונעם לעגענדארן חסיד און פילאנטראפ הנגיד המפורסם ר' געציל בערגער ז"ל פון לאנדאן. ר' שמואל איז געווען אן איידעם ביי הגאון הצדיק רבי שמעון ברייש זצ"ל, זון פון הגה"ק רבי מרדכי יעקב ברייש זצ"ל גאב"ד ציריך ובעל חלקת יעקב, וועלכער איז נישט לאנג צוריק נפטר געווארן לגנזי מרומים.
כל ימי חייו איז ר' שמואל געווען פון די טעטיגע חברי הקהילה אין סאטמאר, געווען פון די גרעסטע תומכים פאר די קהילות און מוסדות, סיי אינערהאלב די סאטמארע אימפעריע אין לאנדאן זייענדיג פון די ראשי קהילה, סיי אין אלע סאטמארע מוסדות איבער דער גארער וועלט, און אזוי אויך פאר סיי וועלכע מוסדות על טהרת הקודש וואס האט גענאסן א זעלטן ברייטע שטיצע פון ר' שמואל ביד רחבה וברוח נדיבה, אויפן דירעקטן השפעה פון מורו ורבו הרה"ק מסאטמאר זי"ע צו וועם ער האט זיך געהאלטן אדוק ומקושר אלע יארן.
ר' שמואל איז געווען א אדרעס ביי יעדער גבאי צדקה און סיי וועלכער משולח עס האט נאר איבערגעטרעטן די ענגלישע באדן, בסבר פנים האט ער יעדן אויפגענומען און געשאנקן גרויסע געלטער פאר יעדע איד, זיין צדקה וחסד איז ווערד א עולם מלא, אין צוגאב צו זיין כח התורה וואס האט זיך אנגעזעהן אויף טריט און שריט, זייענדיג מחבר פילע ספרים אין פארשידענע ענינים.
ליידער איז ער נישט געזונט געווען די לעצטע פאר יאר ל"ע, ער האט זיך געמוטשעט מיט די ביטערע מחלה ה"י, און יעצט אנהייב נאכט אין לאנדאן איז ער נפטר געווארן לחיי העולם הבא, בלויז דריי טעג בעפאר די חתונה פון א אייניקל, איבערלאזנדיג א הערליכע דור בליעה"ר, חשובע קינדער און אייניקלעך דארונטער תלמידי חכמים און מרביצי תורה.
