היינט איז נפטר געווארן אין ארץ ישראל הרבנית הישישה מרת אסתר רחל יאקאבאוויטש ע"ה, משרידי דור הישן פונעם אלטן דור, וועלכע האט זוכה געווען אויפצושטעלן א הערליכע דור פון גאר חשובע קינדער און אייניקלעך בנין וחתנין רבנן, אין טיפן עלטער פון הונדערט און דריי יאר.
די רעבעצין ע"ה איז געווען אשת חבר הרה"ג ר' בנציון יאקאבאוויטש זצ"ל בעל מח"ס ציוני טהרה, וועלכער איז געווען פון די ערשטע סאטמארע חסידים אין בני ברק, און פון די מייסדים פון שיכון קרית יואל סאטמאר, שטייענדיג אלע יארן לימין קדשו פון הרה"ק מסאטמאר זי"ע אוועקצושטעלן די קהילה און מוסדות אין ארץ ישראל.
זי האט זוכה געווען צו זעהן עולמה בחייה, א הערליכע המשכת הדורות מיט גאר חשובע קינדער און אייניקלעך רבנים ומורי הוראה, צווישן אירע איידימער איז געווען הגה"צ ר' אליהו כ"ץ זצ"ל מריסקאווא, גאב"ד שיכון קרית יואל סאטמאר בני ברק צענדליגע יארן, אויך ציילן זיך צווישן אירע איידימער הגה"צ ר' אלכסנדר אשר מרגליות שליט"א אבד"ק אהל משה ווינא, הגה"צ ר' שמעי' יעקב פיש שליט"א זון פון כ"ק אדמו"ר מביקסאד זצ"ל, הגה"צ ר' משה אהרן דאווידאוויטש שליט"א אבד"ק סעקלהיד, און הגה"צ ר' יהושע אייכענשטיין שליט"א אדמו"ר מזידטשויב פתח תקוה.
אזוי אויך ציילן זיך צווישן די אייניקלעך הגה"צ אבד"ק דאברא שליט"א, הגה"צ אבד"ק זוועהיל מאנסי שליט"א, און כ"ק אדמו"ר מזידטשויב ספינקא בית שמש שליט"א, וועלכע זענען איידימער ביי איר זון הגה"צ ר' יעקב שמשון יאקאבאוויטש שליט"א, איידעם ביי כ"ק אדמו"ר מגארליץ זצ"ל.
צווישן די פילצאליגע אדמורי"ם מיט וועם זי האט זיך משדך געווען דורכאויס די יארן, ציילן זיך כ"ק האדמורי"ם מתולדות אברהם יצחק, סערט וויזניץ, וויזניץ, פאפא, פשעווארסק, ראחמיסטריווקא, ראחמיסטריווקא פון לעיקוואד, גאב"ד מאקאווא, משכנות הרועים, דעעש, קאמארנא, שומרי אמונים, נאראל, שענדישוב, קאסאן, סטאניסלאוו, און נאך פיל.
