מיט גרויס צער ווערט אויפגענומען היינט די שווערע בשורה, אז עס איז נפטר געווארן דער לעגענדארער משמש בקודש אין ליובאוויטש, בנן של קדושים הרב חנני' סיני דוד האלבערשטאם ז"ל, וועלכער איז באקאנט מיטן נאמען "חס"ד", די ראשי תיבות פון זיין נאמען.
דער חשובער נפטר איז געווען א זון פון כ"ק אדמו"ר מטשאקאווא הרה"צ רבי מאיר האלבערשטאם זצ"ל, וועלכער איז נפטר געווארן מיט גענוי פערצן יאר צוריק אינעם זעלבן טאג, י"ט כסלו תשע"ב, עלטסטע זון פון כ"ק אדמו"ר הרה"צ רבי יעקב מטשאקאווא זצ"ל, א זון פון הרה"ק רבי סיני מזימיגראד זצ"ל. ער האט געצויגן א הערליכע יחוס בן אחר בן צום הייליגן צאנזער רב הרה"ק בעל דברי חיים זי"ע, למעלה בקודש די צדיקים לבית סיגעט, אוהעל, מעליץ, ראפשיץ, שאץ, פרימישלאן, און נאך פילע צדיקים וקדושים אשר מפיהם אנו חיים. זיין מאמע איז געווען א טאכטער פונעם באקאנטן ותיק וחסיד הגה"ח ר' אהרן יוסף לוריא זצ"ל.
דער חשובער נפטר איז אויפגעוואקסן אויפן שויס פון זיינע חשובע עלטערן אין ארץ ישראל, און אלס יונגע בחור איז ער נתקרב געווארן צו חב"ד, זייענדיג פון די נאנטע מקורבים ביי כ"ק אדמו"ר מליובאוויטש זצ"ל. לאנגע יארן האט ער געהאט די זכיה זיך צו דרייען בקודש פנימה ביים ליובאוויטשער רבי'ן, וואו ער איז געווען דער איבערגעגעבענע משמש פון די אלטע רעבעצין ע"ה, אשת חבר פון כ"ק אדמו"ר הרה"ק מהריי"צ מליובאוויטש זצ"ל. שפעטער האט ער ווייטער ממשיך געווען צו באדינען די רעבעצין ע"ה, אשת חבר כ"ק אדמו"ר מליובאוויטש זצ"ל, און איז געווען דער איינציגסטער וואס האט געהאט די זכיה זיך צו דרייען ביים רבי'ן אין שטוב, און צוזעהן פארשידענע הנהגות דורכאויס די יארן.
חסידי חב"ד איבער די וועלט האבן אים שטענדיג געשעצט און ארויפגעקוקט, וואוסענדיג אז ער האט זוכה געווען צו מקבל זיין גאר אסאך פונעם רבי'נס שטוב און די גאנצע סוויטע.
ליידער האט ער מיטגעמאכט א שווערע טראגעדיע, ווען זיין זון הב' אהרן יוסף (ארי) האלבערשטאם הי"ד איז טראגיש ערמארדעט געווארן אין א טעראר אטאקע אויפן ברוקלין בריק מיט איבער דרייסיג יאר צוריק, א געשעעניש וואס האט אויפגעשאקלט די וועלט, און ווערט נאך דערציילט ביז היינט.
היינט י"ט כסלו אינעם טאג וואס חסידי חב"ד פייערן די חג הגאולה פונעם אלטן רבי'ן דער הייליגער בעל התניא זי"ע, און ווערט אפגעצייכנט אלס ראש השנה לחסידות, איז דער לעגענדארער משמש בקודש הרב חס"ד נפטר געווארן לחיי העולם הבא, אין עלטער פון פיר און זיבעציג יאר, איבערלאזנדיג א דור ישרים יבורך, און זיינע חשובע געשוויסטער לבית טשאקאווא. זיין עלטסטן ברודער איז הרב חיים ברוך האלבערשטאם שליט"א דער לעגענדארער גבאי אין ליובאוויטש. די לוויה קומט פאר היינט נאכמיטאג פארנט פון די חב"ד הויפטקוואטיר אויף 770 איסטערן פארקוועי אין קראון הייטס, און ער וועט קומען לקבורה אויפן בית החיים מאנטיפיורי אין קווינס.
