אין ליכט פון די שרעקליכע גזירה פון גיוס בני הישיבות וואס הויערט אויף אחינו בני ישראל בארץ הקודש, און האט שוין געפירט צו ארעסטן פון איבער א מנין ישיבה בחורים, פארן איינציגן זינד פון זיך נישט שטעלן צום מיליטער, איז באשטעטיגט געווארן די פלענער פאר א היסטארישע יום תפילה ומחאה וואס וועט פארקומען דעם קומענדיגן דאנערשטאג, אינעם יום המסוגל פון ערב ראש חודש אלול מוקדם, בכל רחבי ארץ הקודש ברחובות העיר.
אין אלע שטעט וואו עס וואוינען תורה טרייע אידן, וועלן אלופי אלפי ישראל ארויסקומען אויף די גאסן ארויסצוהייבן א וויי געשריי קעגן די נאכאנאנדע רדיפת הדת, מען וועט זיך פארזאמלען אויף די הויפט גאסן אין שפיץ פון אדמורי"ם רבנים וראשי ישיבות, זאגן פרקי תהלים און סליחות, און איינרייסן רחמי שמים לביטול רוע הגזירה.
לויט די הוראה פון די גדולי הדור, וועט מען מקדיש זיין דעם טאג לתפילה ותחנונים, פאסטן א האלבע טאג ווער עס קען, און ווער נישט זאל זיך אויסלייזן מיט פדיון נפש צדקה געלט. אזוי אויך וועט זיין א ביטול מלאכה אין דעם טאג, אויסער אויב עס ליגט נישט אין די אייגענע באשלוס.
