מטעם קהל חסידי קאסוב איז געמאלדן געווארן אז דעם קומענדיגן זונטאג פרשת במדבר כ"ה אייר, ביומא דהילולא קדישא פון הרה"ק בעל תורת חיים מקאסוב זי"ע, וועט פארקומען א ספעציעלע מעמד "מכון לשבתך", די ערשטע מעמד אין די בנין בית המדרש הגדול והחדש, אין שפיץ פון כ"ק אדמו"ר מקאסוב שליט"א.
די ספעציעלע מעמד ווערט אפגעהאלטן אין סאמע ברען פון די בוי ארבעט אהערצושטעלן דעם בית הגדול והקדוש, וואס דארף אצינד פארזעצן מיט די עבודת הבניה אויף א שנעלן טעמפא, און עס פעלט זיך אויס פרישע געלטער צו פינאנצירן דעם הייליגן פראיעקט.
ביי דעם מעמד "מכון לשבתך", וועלן די חסידים קויפן זיצן אין ביהמ"ד און דערמיט ארויסהעלפן די ווייטערדיגע אנטוויקלונגען צו קענען פאראויסגיין מיט די בוי פראיעקט, די ביהמ"ד זאל שוין קענען באנייעט ווערן אויף די קומענדיגע ימים הנוראים הבעל"ט. דערביי וועט דער קאסובער רבי שליט"א אפרעכטן שולחנו הטהור לרגל די יומא דהילולא קדישא פון זקינו דער הייליגער תורת חיים זי"ע.
