נאך א שווערע נאכט וואס איז אריבער אין די מצב הבריאות ביי כ"ק אדמו"ר מקאסוב שליט"א, ווען דער רבי איז אריינגעפירט געווארן אין שפיטאל אין א שווערע געזונט צושטאנד, איז דער רבי יעצט נאכמיטאג ב"ה באפרייט געווארן פון שפיטאל, און געפונט זיך שוין אויפן וועג אהיים לביתו נאוה קודש אין בארא פארק.
דער רבי שליט"א וועלכער איז ערנסט אפגעשוואכט צוליב א רייע אינפעקציעס און פארשידענע קאמפליקאציעס, וועט זיך ווייטער ערהוילן אינדערהיים אונטער באהאנדלונגען פון א געטרייע שטאב דאקטוירים, און כלל ישראל ווערט געבעטן צו דאווענען ווייטער און מתפלל זיין לרפואת כ"ק מרן הרה"צ רבי שרגא פייוויש בן מלכה לרפואה שלימה.
היינט נאכט אין ארץ ישראל איז פארגעקומען א גרויסע עצרת תפלה והתעוררות אין ביהמ"ד הגדול דקהל תורת חיים וויזניץ אויף רחוב אדוניהו הכהן אין ירושלים, וואו דער מגיד מישרים הרה"ג ר' מנשה ישראל רייזמאן שליט"א האט אויפגעטרעטן מיט דברי התעוררות. מארגן מיטוואך וועט פארקומען א גרויסע עצרת תפלה והתעוררות אין שטאט מאנסי אין די זאל פון בנות ישראל וויזניץ אויף מעיפל עוועניו, וואו הגה"צ ר' חיים פייוויל שנעעבאלג שליט"א אב"ד קהל אברכים וועט אויפטרעטן מיט דברי התעוררות, און כ"ק אדמו"ר מראחמיסטריווקא שליט"א פון ספרינג וואלי וועט פארזאגן פרקי תהלים.
אין די זעלבע צייט ווערט געמאלדן פונעם רבינ'ס שטוב, אז מיטן אויבערשטנס הילף האפט מען צו געבן די מעגליכקייט פאר די חסידים און תושבי העיר אריינצוקומען צום רבי'ן אויף קבלת קהל, ווי פארשטענדליך אויף א באגרעניצע פארנעם, א שטייגער ווי בעלי שמחות בעת חדוותא, אין צוזאמענהאנג מיט די מקורבים ביים רבינ'ס שטוב.
