היינט מיטאג איז כ"ק אדמו"ר מקאסוב שליט"א ווידער אריינגעפירט געווארן אין שפיטאל, נאך וואס דער רבי ליידט פון שווערע אינפעקציעס און הויכע פיבער, דער רבי געפונט זיך אצינד צוגעבינדן צו א רעספערעיטאר אין א גאר שווערע צושטאנד, און איז אנגעוויזן אויף גרויס רחמי שמים. כלל ישראל ווערט געבעטן צו מתפלל זיין און איינרייסן רחמי שמים לרפואת כ"ק מרן הרה"צ רבי שרגא פייוויש בן מלכה, והן קל כביר לא ימאס תפילת הרבים.
ווי געמאלדן איז נעכטן נאכט פארגעקומען א גרויסע עצרת תפילה אין וויזניצע בית המדרש אויף רחוב אדוניהו הכהן אין ירושלים, די בית המדרש איז געווען איבערגעפולט מיט הונדערטער אידן חסידים ואנשי מעשה, דער מגיד מישרים הרה"ג ר' מנשה ישראל רייזמאן שליט"א האט אויפגעטרעטן מיט דברי התעוררות, און דורכ'ן טעלעפאן האט כ"ק אדמו"ר מוויזניץ שליט"א פון ירושלים משמיע געווען פייערדיגע ווערטער בעניני אמונה און תפילה, זאגענדיג אז בדרך הטבע קען מען זעהן א רפואה שלימה, מ'דארף נאר דאווענען און איינרייסן ביים בורא כל עולמים וואס ווארט אויף אונזערע תפילות.
היינט פארנאכטס קומט פאר א גרויסארטיגע עצרת תפילה אין זאל פון בנות ישראל וויזניץ אויף 229 מעיפל עוועניו אין מאנסי, הרה"ג ר' חיים פייוויל שנעעבאלג שליט"א אב"ד קהל אברכים מאנסי וועט אויפטרעטן מיט דברי התעוררות, און כ"ק אדמו"ר מראחמיסטריווקא שליט"א פון ס"וו וועט פארזאגן תהלים פארן עמוד.
