דעם קומענדיגן זונטאג ביום מלאות השלושים צו די הסתלקות פון כ"ק אדמו"ר מקאסוב זצ"ל, וועט פארקומען א גרויסארטיגע עצרת הספד והתעוררות אין די הויכע קעטסקיל בערג, וואו צענדליגע טויזענטער אידן וויילן דורכאויס די זוממער וואכן, איבערהויפט אין די זונטאג טעג ווען מען ארבעט נישט.
די גרויסע עצרת וועט פארקומען אין ביהמ"ד הגדול אין קרית וויזניץ קייאמישע לעיק, וואס געפונט זיך אין סאמע צענטער פון די היימישע קאנטרי געגנטער, די מעמד וועט זיך אנהייבן זונטאג נאכמיטאג 1:45, און די עקסנים גרייטן צו הונדערטער פלעצער צו קענען אקאמאדירן דעם גרויסן ציבור.
ביים עצרת וועט אויפטרעטן כ"ק אדמו"ר מצאנז זוועהיל שליט"א, הגה"צ ר' ברוך האגער שליט"א אב"ד קאסוב לעיקוואד, בנו חביבו פונעם רבי'ן זצ"ל, און הרב החסיד ר' שלמה באכנער שליט"א מנהל ומייסד אירגון בוני עולם, וועלכער האט געהאט א זעלטענע נאנטשאפט מיטן קאסובער רבי'ן זצ"ל.
אזוי אויך וועט פארקומען א עצרת הספד זונטאג פארמיטאג אין בית המדרש אין מחנה טריי סטאר אין וואודבארן, וואו הגה"צ ר' חיים האגער שליט"א אבד"ק קאסוב זאליטשיק, איינציגער ברודער פונעם רבי'ן זצ"ל, וועט אויפטרעטן מיט דברי הספד וזכרון.
די צענטראלע שלושים סעודה וועט פארקומען מאנטאג נאכמיטאג אין זאל פון בית אסתר אין בארא פארק, וואו גדולי הרבנים ומגידים וועלן משמיע זיין דברי זכרון. אין ארץ ישראל וועט פארקומען א באזונדערע שלושים סעודה אין שפיץ פון בנו ממלא מקומו כ"ק אדמו"ר מקאסוב שליט"א, וועלכער האלט זיך אויף די טעג אין ארץ ישראל אויף די זוממער וואכן.
