ווי באקאנט פלעגט כ"ק אדמו"ר הרה"ק מקאסוב זצ"ל וויילן אין ארץ ישראל דורכאויס די זוממער וואכן, און ארומפארן צו די מקומות הקדושים מתפלל זיין לישועת הכלל והפרט, פון די שטערקסטע מעמדים יאר יערליך איז געווען די מעמד התפילה אויפן פלאץ פון משכן שילה, ווען דער רבי פלעגט ארויספארן בראש קהל חסידיו יעדעס יאר ארום די טעג פון חמשה עשר באב, מתפלל זיין מקובל'דיגע תפילות און זינגען ווארעמע ניגונים בהתעוררות רב.
אצינד נאכן הסתלקות פונעם קאסובער רבי'ן זצ"ל, האט בנו ממלא מקומו כ"ק אדמו"ר מקאסוב שליט"א ממשיך געווען דעם הייליגן מנהג, דער רבי וועלכער האט געוויילט אין ארץ ישראל דורכאויס די זוממער וואכן, מקום מושבו ביזן איבערנעמען די כתר האדמורו"ת, איז פארלאפענעם מאנטאג חמשה עשר באב ארויסגעפארן אין באגלייטונג פון פילע חסידים, אויף א תפילת רבים אויפן פלאץ וואו עס איז געשטאנען משכן שילה אין לויף פון הונדערטער יאר, שמשם לא זזה שכינה מעולם.
די נסיעה איז געווארן אהערגעשטעלט דורך אירגון "שמחתי בישועתך" אין שפיץ פון הרב החסיד ר' חיים מאיר שטיינמעטץ הי"ו, וועלכער פירט שוין אן דעם יערליכן מעמד פאר לאנגע יארן כולן שוין לטובה. די מעמד האט זיך אנגעהויבן מיט א ווארעמע תפילת מנחה אויפן מקום קדוש, און דערנאך האט מען געזאגט צען קאפיטלעך תהלים בהתעוררות רב, וואס דער הייליגער של"ה הק' האט מתקן געווען.
די מעמד האט נאכגעפאלגט מיט לענגערע מינוטן פון שירות ותשבחות, מען האט געזינגען ניגוני התרגשות והתעוררות, און דערנאך האט דער קאסובער רבי שליט"א אויפגעטרעטן מיט דברות קודש, ארומרעדנדיג בגודל קדושת המקום, און די געוואלדיגע התגלות וואס זיין פאטער דער רבי זצ"ל האט מגלה געווען, צו פועל'ן ישועות פאר אידישע קינדער אויף דעם הייליג פלאץ, וואו מען זעהט טאקע די קדושת המקום אויף טריט און שריט.
דערנאך האט מען געזאגט די תפילת חנה און זיך ארויסגעלאזט אין פייערדיגע ריקודין אויפן ניגון זרעא חיא וקימא, זייענדיג א פלאץ וואס איז שטארק מסוגל אויסצובעטן זרע של קיימא. דערנאך זענען אלע חסידים אריבער ביים רבי'ן מקבל זיין ברכת הקודש, דער רבי האט יעדן געגעבן א פרי און געוואונטשן ברכות לרוב, זאגענדיג אז דער טאטע דער רבי זצ"ל איז זיכער דא אויף דעם פלאץ, און זיין גרויסע זכות איז מגין אויף ווייטער אויך.
די ישועות ביים משכן שילה זענען ווייטער אפן, עס איז מקובל אלס א מקום מסוגל פאר ישועות, איבערהויפט געהאלפן צו ווערן מיט זרע של קיימא. מען קען שיקן נעמען צו מזכיר זיין לישועת הכלל והפרט, דורכ'ן רופן הרב החסיד ר' חיים מאיר שטיינמעץ הי"ו אויפן טעלעפאן נומער: 011-972-54-840-7409
