אין קהילה קדושה קאסוב אין וויליאמסבורג גרייט מען זיך אצינד אויף א גרויסע מעמד התחלת כתיבת ספר תורה, וואס וועט געשריבן ווערן דורך די חברי הקהילה לזכר נשמתו פונעם רעיא מהימנא און מייסד הקהילה כ"ק אדמו"ר הרה"ק מקאסוב זצ"ל.
די קאסובער קהילה איז געעפנט געווארן א שיינע פאר יאר צוריק, און ווערט געפירט דורך הגה"צ ר' משה האגער שליט"א, בנו חביבו פונעם רבי'ן זצ"ל, דורכאויס די יארן האבן די מתפללי בית המדרש די חסידים געהאט די זכיה נהנה צו זיין מאורו הגדול פונעם רבי'ן זצ"ל, וועלכער איז עטליכע מאל געקומען פראווענען שבתים בקרב חסידיו, און משפיע געווען מהודו והדרו אויף עדת צאן מרעיתו.
די מעמד התחלת כתיבת ספר תורה וועט פארקומען דעם קומענדיגן מאנטאג אויפדערנאכט אינאיינעם מיט א סעודת ראש חודש, אין שפיץ פון הגה"צ ר' משה האגער שליט"א רב הקהילה, בנו חביבו פונעם רבי'ן זצ"ל, וועלכער וועט משמיע זיין דברי ברכה לכבוד המאורע. אויך וועט מען הערן דברי זכרון אויפן רבי'ן זצ"ל, דורך הרה"ג ר' הערשיל ראזענבערג שליט"א דיין ומורה צדק בק"ק וויזניץ אין וויליאמסבורג.
