מיט גרויס שמחה און חדוה דקדושה איז אויפגענומען געווארן די בשורה טובה ומרנינה דורך חסידי ומעריצי בית קאסוב, אז עס איז בשעה טובה ומצלחת געשלאסן געווארן די מקח טוב אויף א גיגאנטישע שטח אדיר אין צענטער פון א היימישע געגנט אין עיר התורה והחסידות לעיקוואוד, אויף וועלכע עס וועט געבויעט ווערן דער בית המדרש הגדול פון כ"ק אדמו"ר מקאסוב שליט"א בנו הגדול וממשיך דרכו בקודש פון כ"ק אדמו"ר הרה"ק מקאסוב זצ"ל.
דער נייער בנין בית המדרש דקהל קאסוב וואס וועט געבויעט ווערן אויף א פרעכטיגער און גרויסארטיגער פארנעם, וועט לויטן פלאן ענטהאלטן א גרויסארטיגער היכל בית המדרש מיט עטליכע זייטיגע שטיבלעך, ווי אויך א היכל התורה מיט א מקוה מפוארה לרווחה, און וועט דינען ווי א מרכז לתורה ולחסידות, וואו דער קאסובער רבי שליט"א וועט פראווען די תפלות און טישן כמסורת האבות הקדושים לבית קאסוב און וויזניץ, און וועט פארשיינען למקהלות עם רב.
לויט ווי געפלאנט אצינד וועט זיך די בוי ארבעט אנהויבן באלד נאך די ימי חג הסוכות הבעל"ט, אויפן גרויסן שטח לקומם ולכונן את בית ה', וגדול יהיה כבוד הבית הזה לשם ולתפארת.
