די חסידישע וועלט באגריסט מיט פרייד די ערשיינונג פון די הערליכע נייע ספר "עבדא דמלכא", ממשנתו פון כ"ק אדמו"ר הרה"ק מקאסוב זצ"ל וועלכער איז נסתלק געווארן דאס יאר, א ספר וואס וועט אריינברענגען אין יעדן איד וואס לערנט דערין, א ריכטיגע אפטייטש אין די הייליגע עבודה אין די ימים הנוראים, און אויפפלאמען די הארץ לתשובה ותיקון המעשים מיט א טיפע באדייט.

ווי באקאנט איז דער קאסובער רבי זצ"ל געווען א נאה דורש ונאה מקיים, משפיע געווען פאר אידישע קינדער און מגלה געווען אוצרות התורה בנגלה ובנסתר, די באדייט פון א שבת, די באדייט פון א יום טוב, א ריכטיגע געפיל אין יום טוב, א ריכטיגע אפטייטש אין עבודת השם, די משמעות פון ממליך זיין דעם אויבערשטן בהאי יומא רבא, די ריכטיגע הכנה וואס פעלט זיך אויס צוצוגיין צו די הייליגע טעג און אויסבעטן א שנת גאולה וישועה.

דאס אלעס איז צוזאמגענומען געווארן לפונדק אחד, אין דעם הערליכן ספר "עבדא דמלכא" אויף מועדים – ירח האיתנים, די ספר ערשיינט דורך מכון שפה ברורה וועלכער איז שוין עוסק לאנגע יארן ארויסצוגעבן דעם רבינ'ס ספרים לאור עולם, און די ספר וועט דאס יאר אריינברענגען א פרישע אור אין טויזענטער אידישע שטיבער לקראת די הייליגע טעג הממשמשים ובאים.

די ערשטע אויפלאגע פונעם ספר איז נתנדב געווארן דורך הנדיב הנכבד ר' בנציון לעבאוויטש הי"ו מגדולי תומכי בית קאסוב, לעילוי נשמת אביו הרב החסיד ר' יחיאל לעבאוויטש ז"ל, ועל שמו יקרא "מהדורת זכרון יחיאל".