מיט גרויס צער און טרויער ווערט אצינד אויפגענומען די ביטערע בשורה, איבער די פטירה פון הרבנית הצדיקת מוויזניץ ע"ה, אשת חבר כ"ק אדמו"ר מוויזניץ שליט"א פון מאנסי, אין עלטער פון 72 יאר.
די רעבעצין איז געווען נישט געזונט פאר לאנגע יארן, און די לעצטע פאר חדשים איז די מצב געווען גאר שווער צוליב א שווערע מחלה ה"י. יעצט ביינאכט האט די רעבעצין אויסגעהויכט איר נשמה ליוצרה, זייענדיג אין די מאונט סיני שפיטאל אין מאנהעטן.
די חשובע רעבעצין הרבנית מרים ע"ה איז געבוירן כ"ז תמוז תשי"ב צו איר גרויסע טאטע הגה"צ רבי אלעזר מייזליש זצ"ל אבד"ק אוהעל, איידעם פון כ"ק אדמו"ר הרה"ק רבי יוסף מדעעש זצ"ל בעל שארית יוסף, זי האט געצויגן א הערליכע יחוס מגזע אראלים ותרשישים, און אויפגעוואקסן אין שויס פון איר גרויסן טאטן דער אוהעלער רב זצ"ל, אינעם ווייטן שיקאגא וואו ער האט משמש געווען ברבנות און משפיע געווען פאר אידישע קינדער.
י"ח סיון תשכ"ט איז זי אריינגעקומען בברית הנישואין, מיט איר גרויסער מאן להבחל"ח כ"ק אדמו"ר מוויזניץ שליט"א על ישראל הדרתו אין שטאט מאנסי, וועלכער איז דער צווייטער זון פון הרה"ק בעל תורת מרדכי מוויזניץ זי"ע. אלע יארן איז זי צוגעשטאנען לימין קדשו, סיי אין די ערשטע פאר יאר נאך די חתונה ווען זיי האבן געוואוינט אין שיקאגא, און בפרט שפעטער ווען מען האט זיך אריבערגעצויגן קיין מאנסי, און דער רבי שליט"א האט פאר צענדליגע יארן משמש געווען ברבנות אין קהילה קדושה וויזניץ.
די רעבעצין לאזט איבער א הערליכע דור פון חשובע קינדער, אייניקלעך, און אור אייניקלעך, די קינדער הגה"צ ר' יעקב יוסף האגער שליט"א איידעם ביי כ"ק אדמו"ר מסקווירא שליט"א, הגה"צ ר' דוד דוב האגער שליט"א איידעם ביי כ"ק אדמו"ר משאץ זצ"ל, הגה"צ ר' חיים מאיר האגער שליט"א איידעם ביי כ"ק אדמו"ר מפאלטישאן בענסענהוירסט שליט"א, הגה"צ ר' משה האגער שליט"א איידעם ביי כ"ק אדמו"ר מביקסאד שליט"א, און הגה"צ ר' מנחם מענדיל האגער שליט"א איידעם ביי כ"ק אדמו"ר מבריזדוביץ שליט"א. די צוויי איידימער זענען הגה"צ ר' נפתלי מרדכי טויב שליט"א אבד"ק קאלוב טשעסנאט רידזש בן כ"ק אדמו"ר מקאלוב שליט"א, און הגה"צ ר' יצחק יוחנן ראטטענבערג שליט"א בן כ"ק אדמו"ר מקאסאני שליט"א.
די גרויסע לוי' וועט פארקומען היינט מיטוואך 12:00 מיטאג פארענט פון ביהמ"ד הגדול שיכון וויזניץ מאנסי, לפי מנהג וויזניץ וועט נישט פארקומען קיין הספדים, מען וועט בלויז אפרעכטן די הקפות און דערנאך באגלייטן צופיס ביז די וויזניץ בית החיים אויף רוט 306 אין מאנסי, וואו די רעבעצין וועט קומען לקבורה אינעם אהל פון איר שוויגער הרבנית הצדיקת ע"ה, הארט נעבן אירע חשוב'ע עלטערן.
שנשמע ונתבשר בשורות טובות.
