אין די צייט וואס די מצב הבריאות ביי כ"ק אדמו"ר מתולדות אברהם יצחק שליט"א איז ליידער נאך ווייט פון גוט, ווען דער רבי געפונט זיך אין די הדסה שפיטאל אין ירושלים זיך מוטשענענדיג מיט א שווערע אינפעקציע און שטארקע יסורים, און איז אנגעוויזן אויף רחמי שמים, איז באשטימט געווארן אויף מארגן דינסטאג א גרויסע יום תפילה פאר כלל תלמידי וחסידי תולדות אברהם יצחק בעיר השם שמה.
די גרויסע מעמד עצרת תפלה והתעוררות וועט פארקומען דינסטאג נאכמיטאג אין ביהמ"ד הגדול תולדות אברהם יצחק אין די מאה שערים געגנט אין ירושלים, מען וועט אנהייבן מיט תפילת מנחה און אמירת ספר רביעי שבתהלים, דערנאך וועט מען הערן א פייערדיגע דרשה לעורר הלבבות פון הגה"צ המשפיע ר' אלימלך בידערמאן שליט"א מלעלוב, נאכגעפאלגט מיט אמירת סליחות פארגעזאגט דורכ'ן משפיע בהתעוררות רב.
פון די שפיטאל ווענט הערט מען אז מען קוקט שטארק ארויס אויף פאזיטיווע אנטוויקלונגען, נאך וואס עס איז פארהאן פארשידענע באהאנדלונגען וואס מען האפט עס וועט עושה רושם זיין לטובה, אויסצוהיילן די שווערע אינפעקציע וואס פלאגט דעם רבי'ן שוין עטליכע וואכן, און צו לינדערן די שווערע יסורים. היינט דורכ'ן טאג האט מען ב"ה מצליח געווען אריינצוברענגען א פרישע דאקטער מיט שטארקע עקספערטיז, וואס גיבט גרויסע שאנסן אז דער רבי זאל זיך ערהוילן אין די נאנטע טעג בעז"ה. כלל ישראל טוט ווייטער מתפלל זיין לרפואת כ"ק מרן שמואל יעקב בן יענטא בתוך שאר חולי ישראל, והן קל כביר לא ימאס תפילת הרבים.
