נעכטן נאכט איז פארגעקומען א גרויסארטיגע אסיפה אין ביהמ"ד הגדול ד'באבוב, וואו מ'האט מייסד געווען א נייע חידוש'ליכע 'חתונה פלאן' וואס וועט געבן מנוחת הנפש פאר באבובער חסידים אינעם צייט פון חתונה מאכן א קינד.

די נייע פלאן איז אהערגעשטעלט געווארן אויפן פארלאנג פון כ"ק אדמו"ר מבאבוב שליט"א, שטייענדיג איידערן עפענונג פונעם נייעם באבובער חתונה זאל 'אהלי פרידא' אין די נייע בנין התלמוד תורה, ווי דער רבי האט ממנה געווען בנו הגדול הרה"צ חיים שלום האלבערשטאם שליט"א צו שטיין אין שפיץ פונעם וועד און אויפקומען מיט א לעזונג צום חתונה קריזיס.

די נייע פלאן וועט שניידן די הוצאות החתונה אויף האלב, אויף פארשידענע אופנים, און בעיקר מיטן מבטל זיין די מסיבת התנאים, שבת אויפרוף סעודה, און נאך איבריגע הוצאות. בראש וראשון שטייט די נייע זאל מיט א פולשטענדיגע תקנות פעקעדזש מיוחד פאר באבובער חסידים, פארן פרייז פון 16 טויזענט דאלער, אריינגערעכנט: שפילער, זינגער, בלומען, בילדער און אלע איבריגע אויסגאבען וואס אלע זאלן קאסטן, דאס הייסט בלויז 8 טויזענט דאלער א זייט פארן חתונה נאכט.

דער וואס וועט זיך האלטן צום חתונה פלאן וועט ענהאלטן פון די נייע גמ"ח הקהילה די ריזן סכום פון $40,000, וואס מ'וועט דארפן צוריקצאלן אין בלויז געציילטע הונדערט דאלער'דיגע תשלומין וואס מאכט עס גאר גרינג. אזוי אויך שטייט ווייטער די קרנות פאר חתנים און כלות און טיילט צווישען 10-15 טויזענט דאלער במתנה גמורה לכל מי דבעי.

די נייע פלאן איז אויפגענומען געווארן מיט גרויסע שמחה, ווי דער רבי האט עס ארויסגעברענגט ביים מעמד "היינט, י"א סיון, וועט אריינגיין אינעם קורת ימי קהילתנו הק' אלס א יום טוב פאר אלע אנשי שלומינו" אז מ'וועט קענען חתונה מאכן אן קיין געלט דאגה אויפן קאפ מהיום והלאה.