נאך עטליכע וואכן פון העפטיגע בוי ארבעט אהערצושטעלן די נייע פליגל בבנין ביהמ"ד הגדול דקהל שערי ציון ד'באבוב אין בארא פארק, איז עס דעם שבת סליחות באנייעט געווארן אין א מזל'דיגע שעה, צוברענגענדיג נאך הונדערטער זיצן פאר די חסידים לקראת די הייליגע טעג הבעל"ט.
די נייע אפטיילונג איז געבויעט געווארן אויף די זייט פון די זיבן און פערציגסטע סטריט, וואו די באבובער קהילה האט אפגעקויפט א דערנעבענדיגע בנין צו קענען פארברייטערן די גבולי הקדושה. דעם שבת איז צום ערשטן מאל גענוצט געווארן די נייע פליגל, און פרייטאג נאכמיטאג איז כ"ק אדמו"ר מבאבוב שליט"א אנגעקומען אויף קביעת מזוזה ביי די טויערן פון די נייע אפטיילונג, צו די זייט פון די זיבן און פערציגסטע סטריט.
ווי באקאנט איז דער באבובער רבי זיך נוהג ארומצוגיין בשעת'ן דאווענען איבער די היכל ביהמ"ד שטיל מאכן די וואס רעדן ביים דאווענען, דעם שבת ביי די תפילות איז דער רבי אויך אריין אין די נייע פליגל ביים ארומגיין, וועלנדיג זיכער מאכן אז מען הערט גוט דעם קול התפילה. אזוי אויך ביים טאנצן נאכן טיש איז דער רבי אריינגעטאנצן אין די נייע פליגל צו מחדש זיין די נייע טייל ביהמ"ד מיט שירה וזמרה.
