די מעלדונגען און צוגרייטונגען בעפאר דעם גרויסן כינוס, איז בלויז געווען א משל צו דאס וואס האט זיך פאקטיש אפגעשפילט דעם זונטאג אויפדערנאכט, ווען טויזענטער תלמידים חסידים און ידידים לבית קאשוי, האבן זיך צונויפגעזאמלט תחת קורת גג אחד, און אוועקגעשטעלט א יסוד איתן פאר די ישיבה הקדושה אהל רפאל קאשוי, זיך שטעלנדיג לימין הקודש פונעם ריש מתיבתא קדישא כ"ק אדמו"ר מקאשוי שליט"א.
ווי באריכטעט איז די מעמד פארגעקומען בליל ההילולא קדישא פון הגה"ק רבי שאול בראך זצ"ל אבד"ק קאשוי, וועלכער האט אויפגעשטעלט די בארימטע קאשויער ישיבה וואס איז שפעטער געווארן איבערגעפלאנצט אין אמעריקע, דורך תלמידו הנאמן וממלא מקומו מרן הגה"ק מקאשוי זי"ע בעל ברכת שמים, און ווערט ביז היינט געפירט ביד רמה דורך בנו ממשיך דרכו בקודש כ"ק אדמו"ר מקאשוי שליט"א.
פון די געהויבענע מאמענטן דורכאויס די נאכט, איז געווען ווען כ"ק אדמו"ר מקאשוי שליט"א האט אנגעהויבן שרייבן א ספר תורה, וואס ווערט געשריבן אין א פאראייניגטע שטימונג דורך כלל תלמידי וחסידי קאשוי, לזכותו ולכבודו פון כ"ק אדמו"ר מקאשוי שליט"א. ביים רבינ'ס ערשיינונג איז די עקסטאז ביים ציבור האלפים געווען גאר הויעך, ווען מען האט מיטגעהאלטן באשיינפערליך ווי די גאלדענע קייט ציהט זיך ווייטער און די לעכטיגע הרבצת תורה פונעם רבי'ן זצ"ל פארמאגט א גלאררייכע המשכה.
דורכאויס די מעמד האבן אויפגעטרעטן מיט א רייע דרשות, דער אורח הכבוד הגה"צ רבי אהרן שיף שליט"א גאב"ד אנטווערפן, הגה"צ ר' משה מנחם בלום שליט"א בנו חביבו פונעם רבי'ן זצ"ל, די משא המעמד און דברות קודש דורכ'ן רבי'ן שליט"א, און א ספעציעלע אויפטריט דורך הנדיב המפואר ר' שאול נח פריעדמאן הי"ו מגדולי התומכים.
די ציבור האלפים זענען געכאפט געווארן אין שאק ווען הנדיב ר' שאול נח האט אינמיטן זיין דרשה ארויפגערופן דעם רבי'ן שליט"א, און איבערגעגעבן פארן רבי'ן א ליידיגע טשעק אונטערגעשריבן, זאגענדיג אז די צאל נדבות וואס קומען אריין פאר די ישיבה דורכאויס דעם גאנצן מעמד ביז די קומענדיגע וואך, זאל דער רבי אליינס אריינשרייבן אינעם טשעק, און ער וועט צושטעלן פולקאמע דעקונג דערויף צו פארדאפלען די גרויסע נדבות הציבור.
אויך איז פארגעקומען א פאנעל פון די עלטערע תלמידים וואס האבן געשילדערט רייכע זכרונות פון אריבער אכציג יאר בקודש פנימה, און א הערליכע אויסשטעל מיטן נאמען בקודש חזיתיך האט אויפגעברענגט טייכן היסטאריע און נאסטאלגיע, זכרונות און מאמענטן פונעם רבי'ן זצ"ל בהלו נרו עלי ראשינו.
די גאנצע מעמד איז געווען אהערגעשטעלט מייסטערהאפטיג אין די גיגאנטישע דאגגעל גרינהאוז פלאזא אין די ברוקלין נעווי יארד קאמפלעקס, און איז געפירט געווארן דורך די ברייט בארימטע YF פראדאקשען פירמע, אין שפיץ פון העסקן המפורסם ר' יוחי פליישמאן הי"ו און זיינע געטרייע מיטהעלפער.
