אן אייגענארטיגע פארזאמלונג איז פארגעקומען דעם זונטאג אין ניו דזשערזי, צו וואו עס זענען געקומען צו פארן צענדליגע עסקנים אויפן טעכנעלאגישן געביט, וואס פירן אן די אריבער פערציג טע"ג לאקאציעס איבער די וועלט.
די קאנווענשן איז פארגעקומען אין א פראכטפולע לאקאל אין נוארק ניו דזשערזי, און האט זיך פארצויגן פאר מער ווי צען שעה, אנגעהויבן פון עלף אזייגער פארמיטאג ביז נאך צען אזייגער ביינאכט. עס האט אריינגענומען לעבעדיגע דרשות און פרעזענטאציעס, פאנעלן און דיסקוסיעס, און א רייע אסיפות דורך די טעטיגע עסקני טע"ג צו פארבעסערן הילף פאר כלל ישראל צו קענען שטיין פעלזן פעסט קעגן די טעכנעלאגישע נסיונות און די כסדר'דיגע חידושים אין די טעכנעלאגישע וועלט.
אין שפיץ פון די קאנווענשן איז געווען העסקן הנמרץ הרב נחמי' גאטליעב שליט"א יו"ר טע"ג העולמי, מען האט געהערט א דרשה פון הרה"ג ר' דוד לייב פישער שליט"א מו"ץ בק"ק פאפא ומרבני האירגון, אויך האט אויפגעטרעטן הרה"ג ר' יצחק סורוצקין שליט"א ראש ישיבה מתיבתא ד'לעיקוואד, און הנדיב החסיד ר' אברהם חיים שאמועל הי"ו פון וויליאמסבורג מגדולי תומכי אירגון טע"ג.
גאר אינטערסאנט און היסטאריש איז געווען ווען עס האבן זיך צוזאמגענומען טעטיגע עסקנים פון אלע עקן וועלט, וואס שטייען אין שפיץ פון אלע טע"ג אפיסעס לטוהר המחנה, פון אלע סארט קרייזן מיט אלע סארט שפראכן. אנגעהויבן פון די פאראייניגטע שטאטן, דרום אמעריקע, ענגלאנד, אייראפע, ארץ ישראל, אסטראליע, לאס אנדזשעלעס, און אלע שטעט וואו אידישע קינדער האבן אן אחוזה, מיט א געפיל צו שטיין על המשמר קעגן די נסיונות הדור.
