אין א זעלטן רירנדע מאמענט האבן טויזענטער וויזניצע חסידים שווארץ געמאכט די גאסן פון קרית וויזניץ בני ברק דעם זונטאג ביינאכט, און באגלייט דעם געטרייען מנהיג כ"ק אדמו"ר מוויזניץ שליט"א וועלכער איז ארויסגעפארן אויפן וועג קיין לאס אנדזשעלעס, מיטן האפענונג אז די פעולות רפואה זאל עושה רושם זיין, די ארטיגע דאקטוירים זאלן האבן סייעתא דשמיא צו אויסהיילן דעם רבי'ן פון די ביטערע מחלה ה"י, וואס האט אריינגעשלעפט דעם רבי'ן אין א גאר שוואכן געזונט צושטאנד רח"ל.
איידערן ארויספארן האט דער רבי מפריש געווען א גרויסע סכום געלט פאר צדקה, און דער רבי האט ווארעם געזעגנט די חסידים זייענדיג אין קאר, און זיך אנגעשטרענגט צו מאיר פנים זיין פאר די פארזאמלטע. מען האט געזינגען ניגונים און די פילקעפיגער ציבור האט באגלייט דעם רבי'ן אויף די גאסן, שעפשענדיג א תפילה אז דער רבי זאל פארן און צוריקקומען געזונטערהייט.
אין לופטפעלד האבן אפגעווארט דעם רבי'ן עטליכע גדולי האדמורי"ם, כ"ק אדמו"ר מבאיאן שליט"א, כ"ק אדמו"ר מתולדות אברהם יצחק שליט"א, און דעם רבינ'ס איינציגער ברודער כ"ק אדמו"ר מוויזניץ שליט"א, וועלכער איז מיט א ספעציעלע ערלויבעניש ארויפגעלאזט געווארן אויפן פליגער, און זיך גאר הארציג געזעגנט לחיים ולשלום.
אויך האט כ"ק אדמו"ר מבעלזא שליט"א זיך פארבינדן מיטן רבי'ן דורכ'ן טעלעפאן, און ווארעם געוואונטשן הצלחה און סייעתא דשמיא, און א רפואה שלימה בקרוב.
