ווי באריכטעט מיט עטליכע וואכן צוריק בעפאר די ימים הנוראים, האט כ"ק אדמו"ר מבאבוב שליט"א אויפגענומען זיין איידעם הגה"צ ר' יחזקאל ליפשיץ שליט"א לכהן פאר אלס דיין און מורה צדק פון די שיינע באבובער קהילה אין לינדען ניו דזשערזי, א קהילה נאה וחסידה וואס ציילט זיך שוין היינט איבער צוויי הונדערט משפחות בליעה"ר, א פולע אוועקגעשטעלטע קהילה קדושה, בנינים אדירים און אלע באדערפענישן, מוסדות הקדושים לשם ולתפארת, פראיעקטן און ארגענעזאציעס ארויסצוהעלפן די חברי הקהילה איינער דעם צווייטן.
דער נייער דיין הגה"צ ר' יחזקאל ליפשיץ שליט"א, איז א זון פון הרב החסיד ר' אליהו ליפשיץ שליט"א מחשובי חסידי באבוב, ער איז דער דריטער איידעם ביים רבי'ן שליט"א, נאך די צוויי עלטערע וואס האבן שוין באקומען א דיינות פאסטן בקרב חסידי באבוב, הגה"צ ר' חיים שלמה האלבערשטאם שליט"א סגן דומ"ץ באבוב, און הגה"צ ר' חיים דוד וואקסמאן שליט"א דומ"ץ באבוב מאנסי.
אצינד איז באשטעטיגט געווארן די פלענער איבער א גרויסע מעמד הכתרה וואס וועט פארקומען בתוככי הקהילה, דעם קומענדיגן זונטאג פרשת וישלח י' כסלו, אינעם גרויסן בנין פון מוסדות באבוב אין לינדען, אין שפיץ פונעם מנהיג העדה כ"ק אדמו"ר מבאבוב שליט"א.
