אַ גאר הערליכער, און באדייטפולער "מעמד קביעת מזוזה" האָט די שטאט מאנסי געהאַט די זכי' מיטצולעבן דעם פאַרלאפענעם וואך, אין שפּיץ פון כ"ק מרן דער מאקאווער רב שליט"א וועלכער איז געקומען צו פארן פון ארץ ישראל, און האט זיך באטייליגט ביים הערליכן מעמד פונעם באנייאונג צום "לב" פידיעטריק קעיר וועלכער וועט שטיין צו הילף פון מאנסיער קינדער-געבענטשטע פאמיליעס מיט איבערגעגעבנקייט און געטריישאפט פאר לאנגע יארן מיטן אויבערשטנס הילף.
ביים גרויסאַרטיגן מעמד – און פריידיגן ווענדפּונקט אַז מ'גייט אַצינד קענען אנהייבן סערוויסן די אלע מאנסיער קינדערלעך מיטן אויבערשטנס הילף – האָט זיך באַטייליגט אַ ציבור פארזאמלטע וואס זענען אַריינגעטון, און האַלטן מיט די פּעולות וואָס גייען אַרויס פון די לב הויפּטקווארטירן.
דער נייער ״לב״ לאקאל אינעם פאמאנא מאלל קומט אלס הוספה צום אלעמען באליבטן ״לב פעמילי העלט סענטער״ (אמאליגער מאנסי אורזשענט קעיר) וועלכער שטייט צום דינסט פאר מאנסיער איינוואוינער אין יעדן עלטער, זייענדיג לאקירט אינעם עווערגרין מאלל און אונטערן פירערשאפט פונעם בארימטן דאקטאר מארק שוסטער.
די באטייליגטע האבן געהאט די זכי' מיטצוהאלטן און הערן דברות קודש פונעם רב שליט"א, וועלכער האט צווישן אנדערע ארויסגעברענגט גאר שטארק אז יעצט ווען מען שטייט בעפאר חנוכה, איז דא א ספעציעלער סגולה אז עס זאל זיין א גרויסער ברכה. דאן האט דער רב זיך אריינגעלאזט אין א תורה'דיגער שמועס איבער הדלקת נר חנוכה, צי דאס זאל זיין אינעם געשעפט, צי איז ליבערשט אז מען זאל אהיימגיין פארברענגען מיט די ווייב און קינדער. דער רב האט נישט געוואלט מכריע זיין, אבער האט ארויסגעברענגט אז ס'איז פארהאנען א גרויסער ענין פון אריינברענגען דעם אור החנוכה אין יעדן ארט, אויך וואו מען ארבעט, און זיכער אויף אן ארט וואו עס וועלן אזויפיל מענטשן געהאלפן ווערן.
דאן האט זיך געמאכט א שמועס איבער מאכן א ברכה ביים קביעת מזוזה, און דער רב האט געזאגט אז מען זאל אוודאי יא מאכן א ברכה. ער האט ארויפגעלייגט די האנט אויפן מזוזה און ווארעם געוואונטשן אז דער מקום זאל מיטן אויבערשטנס הילף זיין א ברכה פאר אידישע קינדער, און ס'זאל פון דארט ארויסקומען אסאך הילף פאר אלעמען.
דערנאך האט דער רב געזאגט א גאר שיין ווארט אז אין פרשת חיי שרה ווערט געברענגט אז אליעזר עבד אברהם האט געבעטן דעם אויבערשטן אז ער זאל טון מיט אים א חסד און ברענגען א שידוך פאר יצחק. שטעלט זיך אבער די קשיא, פארוואס האט אליעזר נישט געגלייבט אז אויב אברהם האט אים געשיקט איז פשוט אז דער שידוך וועט אנקומען, נאר דער תירוץ דערויף איז אז אליעזר האט טאקע געוואוסט אז דער שידוך וועט אנקומען, נאר ער האט געוואלט זיין דער גוטער שליח דערפאר. דאן האט מען געזינגען מיט א ווארעמקייט דער ניגון ״בנה ביתך״.
דערנאך האט דער רב ווארעם געוואונטשן און געטרינקען לחיים, און אויסגעפירט בברכת קדשו אז דער מקום זאל טאקע דינען לשם ולתפארת, און באדינען כלל ישראל'ס געברויכן מיט הארץ. "לב" איז ווי באקאנט אויסגעשטאטעט מיט די בעסטע און פארגעשריטנסטע מעטאדן און גאר ערפארענע דאקטורים, און וועט טאקע שטיין צו הילף פאר די מאנסי איינוואוינער מיט אן איבערגעגעבנקייט און געטריישאפט.
