די אידישע געמיינדע אין מעלבארן אויסטראליע און איבער די גאנצע וועלט, נעמט אויף מיט שווערע געמיטער די בשורה, אז עס איז נפטר געווארן דער באקאנטער מלחמה איבערלעבער הישיש ר' בעריש אויערבאך ע"ה, וועלכער האט דערלעבט א זעלטענע שיבה טובה, גרייכענדיג הונדערט און פינף יאר.
ר' בעריש איז שטארק באקאנט געווארן אין די לעצטע פאר יאר, ווען טראץ זיין הויכן עלטער איז ער אנגעגאנגען מיט א זעלטענע פרישקייט, און פלעגט דאווענען פארן עמוד מיט פרישע כוחות, איבערהויפט ביי די יארצייט פון זיין מאמע ע"ה וועלכער איז נפטר געווארן מיט איבער הונדערט יאר צוריק, ווען ר' בעריש איז געווען א קליין קינד, זייענדיג א זעלטנהייט אז א קינד זאל זאגן קדיש נאך אייגענע עלטערן אזויפיל יארן נאכאנאנד.
ר' בעריש איז אויפגעוואקסן אין פוילין אין שטאט ביאלא, און אלס קליין קינד פון בלויז עטליכע חדשים איז ער פאריתומ'ט געווארן פון זיין מאמע ע"ה, ער האט מיטגעמאכט די ביטערע קריגס יארן זייענדיג אין די ווארשעווער געטא, ער איז פון דארט געווארן ארויסגעראטעוועט בעפאר די לעצטע מינוט, ווען א גרויס טייל פון זיין משפחה זענען ליידער אומגעקומען על קידוש השם.
נאכן קריג איז ער אנגעקומען קיין אויסטראליע וואו ער האט אוועקגעשטעלט א שיינעם שטוב, און מיט גרויס הצלחה אין ביזנעס אויך ארויסגעהאלפן אנדערע אידן. זיין זעלטענע שיבה טובה מיטן קלארן דעת האט אינספירירט אסאך מענטשן איבער די וועלט, אריינגערעכנט דער בריטישער קעניג טשארלס דער דריטער וועלכער האט אים אפגעשיקט א ווארעמע וואונטש צום הונדערט און פיפטן געבורטסטאג.
מיט בלויז דריי וואכן צוריק ערב פסח תשפ"ו האט ער נאך געפראוועט א סיום מסכתא זייענדיג א בכור, אין זיין קביעות'דיגע בית המדרש אין קולפילד מעלבארן. און היינט איז ער נפטר געווארן לחיי העולם הבא בשיבה טובה.
