די הונדערטער איינוואוינער אין שטאט לינדען אין ניו דזשערזי, האבן מיט פרייד אויפגענומען די נייעס אז דאס יאר וועט כ"ק אדמו"ר מקאסאן שליט"א אפרעכטן א גרויסארטיגער מעמד הדלקה לכבוד ל"ג בעומר, מיט די באטייליגונג פון הונדערטער תושבי העיר והגלילות.
דאס קומט נאך עטליכע יאר וואס כ"ק אדמו"ר מקאסאן שליט"א האט מייסד געווען און פירט זיין שיינעם הויף אין לינדען, וואס איז דורכאויס די פאר יאר אויסגעשטיגן אלס א ווארעמע ווינקל פאר הונדערטער חסידישע פאמיליעס, מיט פילצאליגע קהילות און בתי מדרשים פון פילע חסידישע קרייזן.
ביז היינט פלעגט דער רבי שליט"א נישט פראווענען א גרויסע הדלקה יעדעס יאר, איין יאר האט דער רבי אפגעראכטן א הדלקה אין שטאט לעיקוואד, ביים מעמד הנחת אבן הפינה פאר די נייע קאסאנער בית המדרש אין שטאט, און פארלאפענע יאר תשפ"ה האט דער רבי אפגעראכטן א הדלקה אינעם ווייטן שיקאגא, ווערנדיג געלאדנט דורך די ארטיגע תושבים.
אצינד איז באשטעטיגט געווארן אז צום ערשטן מאל אין לינדען רבתי וועט דער רבי שליט"א אפרעכטן א גרויסע מעמד ההדלקה במעמד די הונדערטער תושבי העיר, וואס וועלן זיך דערווארעמען בהילולא דרשב"י בצל הקודש פונעם רבי'ן, די מעמד ההדלקה וועט פארקומען מאנטאג נאכט ליל ל"ג בעומר אויפן ריזן שטח פארנט פון תלמוד תורה באבוב, נאכגעפאלגט מיט די סעודת הילולא און שולחן הטהור לכבוד היום, אינעם גרויסן זאל אין די באבובער תלמוד תורה.
