הונדערטער אידן חסידים ואנשי מעשה תושבי ניו יארק, האבן אין די יעצטיגע וואכן מיטגעלעבט א געהויבענער באזוך דורך אחד מחשובי האדמורי"ם בארץ הקודש, כ"ק אדמו"ר מאהל נחמן ספינקא שליט"א על ישראל הדרתו אינעם עיר התורה והחסידות בני ברק, וועלכער האט באזוכט דאהי פאר צוויי וואכן אוועקצושטעלן א פעסטע יסוד פארן הייליגן מקום תורה ותפילה, די נאסטאלגישע ספינקא בית המדרש אויף רחוב רבי יהושע, וואו דער רבי שליט"א איז ממשיך מסורת אבותיו הקדושים לשם ולתפארת.
דער רבי שליט"א איז אנגעקומען קיין ניו יארק פארגאנגענעם פרשת שלח, און האט דעם ערשטן שבת געפראוועט ברוב עם הדרת מלך אינעם עיר ואם בישראל וויליאמסבורג, די געהויבענע טישן האט דער רבי געפראוועט אין ביהמ"ד מאחנובקא בעלזא אויף קיעפ סטריט, וואו הונדערטער אידן האבן זיך געקלאמערט לאורו הבהיר דורכאויס די פילע שעות פון תענוג רוחני.
דער רבי שליט"א האט געהאט די אכסניא אין שטוב פון ש"ב הגה"צ ר' מענדיל הערש כהנא שליט"א דומ"ץ קארלסבורג, און פרייטאג צונאכטס האט דער רבי געדאווענט אין ביהמ"ד מאחנובקא בעלזא, וואו דער רבי האט יורד געווען לפני התיבה צו תפלת מנחה בהתעוררות רב. ביים טיש פרייטאג צונאכטס האט דער רבי קידוש געמאכט מיטן טלית בנוסח ספינקא זידטשויב, און פאר לענגערע שעות ביז דרייע פארטאגס האט מען פארברענגט אינאיינעם הונדערטער אידן בצילא דמהימנותא בשירות ותשבחות ודברי תורה.
שבת אינדערפרי האט דער רבי געדאווענט די תפילות אין ביהמ"ד קארלסבורג, בצל הקודש פונעם פעטער כ"ק אדמו"ר מקארלסבורג שליט"א, וועלכער האט מכבד געווען דעם רבי'ן ביותרת הכבוד, דער רבי האט געדאווענט מוסף פארן עמוד, און דערנאך אגעראכטן א גרויסן קידוש לכבוד די בר מצוה פון א זון ביי ש"ב הגה"צ דומ"ץ קארלסבורג שליט"א דעם רבינ'ס בעל אכסניא. ביים קידוש האט דער רבי אויפגעטרעטן מיט דברות קודש איבער די וויכטיגקייט פון אנהאלטן די מסורה וואס מ'האט געזעהן ביי די עלטערן.
מנחה און שלש סעודות האט דער רבי ווידער געפראוועט אין ביהמ"ד מאחנובקא בעלזא, וואו עס האט זיך אנגעזעהן א ריזן שטראם פון חסידים ומעריצים, נאך לענגערע ניגוני התעוררות און די זמירות שבת אויפן ספינקא נוסח, האט דער רבי משמיע געווען דברות קודש בעניני בטחון, נאך מעריב האט דער רבי געמאכט הבדלה און געשפריצט די וויין אויף די קינדערלעך כנהוג.
אין לויף פון די וואך איז פארגעקומען א שיינע מסיבה בית צדיקים יעמוד, אין ביהמ"ד ליזענסק אויף היוז סטריט אין וויליאמסבורג, עס האבן זיך אנגעזעהן א שיינער ציבור וואס האבן זיך ווארעם אנגערופן ארויסצוהעלפן דעם מקום קדוש די ספינקא בית המדרש אין בני ברק. אלס יושב ראש האט אויפגעטרעטן הרב מענדיל טויסיג שליט"א פון ארץ ישראל, און אלס נואם הכבוד האט אויפגעטרעטן הגאון החסיד ר' יוסף חיים גרינוואלד שליט"א מגיד מישרים, וועלכער האט דערציילט רייכע זכרונות פון אמאל ווען ער האט זיך מסתופף געווען בצל קדשו פון הרה"ק רבי נחמן מספינקא זצ"ל.
די דבר המעמד איז געווארן איבערגעגעבן דורך הרה"ח ר' חיים מאיר טאבאק הי"ו, און דער רבי שליט"א האט משמיע געווען דברות קודש איבער די גרויסקייט פון שטיצן דעם מקום קדוש, וואס דער זיידע זצ"ל האט זיך מוסר נפש געווען אויפצושטעלן, און אידישע קינדער וואס האבן דאן געהאלפן האבן געזעהן גרויסע ישועות. דערנאך האט דער רבי פארטיילט פאר די נדיבי לב די מקובל'דיגע קמיע לשמירה ולהצלחה פון הרה"ק בעל ארחות חיים מספינקא זצ"ל.
דורכאויס די וואך האט דער רבי שליט"א אפגעשטאט ביקורי נימוסין ביי די גדולי האדמורי"ם אין וויליאמסבורג, כ"ק אדמו"ר מסאטמאר שליט"א, כ"ק אדמו"ר מפאפא שליט"א, די ברידער כ"ק האדמורי"ם מבית יצחק ספינקא, תולדות צבי ספינקא, און קראלי שליט"א, ביי מחותנו כ"ק אדמו"ר מזלאטשוב וומס"ב שליט"א, און ביי הגה"צ ר' יצחק אייזיק שנעעבאלג שליט"א אבד"ק מאחנובקא בעלזא וומס"ב.
א ספעציעלע באזוך האט דער רבי אפגעהאלטן אין ישיבת קראלי, וואו דער רבי האט משמיע געווען דברות קודש פאר די בחורים איבער די חשיבות פון יעדע פעולה לטובה וואס א בחור טוט, און צום שלוס זענען אלע בחורים אריבער שלום נעמען. אזוי אויך איז פארגעקומען ספעציעלע זמני קבלת קהל וואו פילע אידן זענען אריין אל הקודש פנימה לעצה ולברכה.
שבת פרשת קרח האט דער רבי געוויילט אין שטאט מאנסי, און געפראוועט די תפילות און טישן אין ישיבת עץ חיים אינאיינעם מיט די תלמידי הישיבה. דער רבי שליט"א האט געפראוועט אלע סעודות שבת אינאיינעם מיט די בחורים און משמיע געווען לענגערע שמועסן בדברי תורה, חיזוק והדרכה, שלש סעודות האט דער רבי געזאגט תורה אויפן זידטשויבער נוסח, און ארומגערעדט אז שפלות רוח זיך האלטן קליין ברענגט צו אחדות און דיבוק חברים.
