אין די יעצטיגע טעג איז געשלאסן געווארן א מוצלח'דיגע מקח וואס ברענגט אויף שמחה וחדוה ביי גאנץ כלל ישראל, א פרישע גרויסע געביידע אין ברוקלין וואס וועט פארוואנדלט ווערן אלס א גרויסע באקוועמע אכסניא פאר די באקאנטע "פאפא צעהלים מצה בעקעריי", פון וואו עס ווערט צוגעשטעלט מהודר'דיגע מצות פאר כלל ישראל מדי שנה בשנה שוין צענדליגע יארן נאכאנאנד.
די בעקעריי ווערט שוין געפירט לאנגע יארן אונטער די דירעקטע השגחה פון קהילות פאפא און צעהלים. כ"ק אדמו"ר מפאפא שליט"א שטייט אין שפיץ פון דעם כשרות אפאראט אינאיינעם מיט כ"ק אדמו"ר מצעהלים שליט"א צו פארזיכערן די העכסטע מאס כשרות בהידור, און פארט כסדר אראפ און שיקט די דייני הקהילה צו די ווייץ שניטן און די מצות באקן צו מיטהאלטן פונדערנאנט.
דער פאפא רבי שליט"א האט שוין עטליכע מאל אויסגעדרוקט רצון קדשו צו קענען פארשטערקערן די הידורים וואס ער האט מקבל געווען פון זיין גרויסן פאטער כ"ק אדמו"ר הגה"ק מפאפא זצ"ל, אין צוגאב צו די פאקט אז די בעקעריי דארף זיך ערנסט פארברייטערן צו קענען סערווירן דעם ציבור בליעה"ר.
אצינד איז די הנהלת בית האופה אינאיינעם מיט די הנהלת הקהילות אריינגעשפרינגען אין א פראיעקט אפצוקויפן א גרעסערע געביידע, און מיטן אויבערשטנס הילף האט מען זוכה געווען לברך על המוגמר, און געשלאסן מקח אויף א גרויסע געביידע אין די פראספעקט פארק געגנט צווישן בארא פארק און וויליאמסבורג, וואו די מצה בעקעריי וועט זיך אריבערציען בקרוב הימים און מען וועט בעז"ה קענען פארשטערקערן די הידורים.
פארגאנגענע וואך איז פארגעקומען אן אסיפה בביתו נאוה קודש פון כ"ק אדמו"ר מפאפא שליט"א, וואו עס איז דורכגעשמועסט געווארן די ווייטערדיגע פלענער, און דער רבי שליט"א האט גאר ווארעם געוואונטשן די חברי ההנהלה און עסקנים צו גומר זיין דעם מקח מיט גרויס הצלחה. אזוי אויך האט כ"ק אדמו"ר מצעהלים שליט"א גאר ווארעם געוואונטשן די עסקנים צו פאראויסגיין דערמיט, צו קענען זיין מוסיף והולך אויף א שטארקע פארנעם.
