בחצר הקודש קראלי גרייט מען זיך אויף א געהויבענע שמחת החתונה, ווען כ"ק אדמו"ר מקראלי שליט"א וועט פירן אונטער די חופה בתו הכלה החשובה, מיט די חתן א אור אייניקל פון כ"ק אדמו"ר ממעליץ שליט"א, אייניקל פון זיין זון הגה"צ ר' נפתלי הורוויץ שליט"א אב"ד זכרון נפתלי, א זון פון זיין זון הגה"צ ר' מנחם מענדיל הורוויץ שליט"א, איידעם ביי הגה"צ ר' זושא כ"ץ שליט"א אב"ד ראצפערט.
די גרויסע חתונה וואס קומט פאר די קומענדיגע וואך דינסטאג פרשת כי תצא ז' אלול, וועט אין א ערשטמאליגע שריט געפראוועט ווערן אין קראלי הויף מבואו ועד צאתו, עס ווערט אויפגעשטעלט א ריזן שאטער הארט נעבן ביהמ"ד הגדול אויף וואלאבאוט, אויפן שטח וואס איז מוקדש אויפצובויען א פרישע פליגל פארן בית המדרש אין די נאנטע צוקונפט, און ווערט אצינד צוגערישט צו זיין די אכסניא פאר די געהויבענע שמחה בבית צדיקים.
ווי ביי די פריערדיגע שמחות וועט די מעמד קבלת פנים פארקומען אין ביהמ"ד הגדול, און די מעמד החופה אויפן גאס פארנט פון ביהמ"ד, די סעודת החתונה וועט ווערן צוגעשטעלט פארן גאנצן ציבור אינעם בנין ביהמ"ד ובכל מבואותיה, און די ריקודין של שמחה נאכגעפאלגט מיט די מצוה טאנץ, וועט פארקומען אינעם גרויסן שאטער הארט נעבן ביהמ"ד ברוב פאר והדר במקהלות אלפי חסידים.
די שמחת החתונה וועט ווערן נאכגעפאלגט מיט געהויבענע ימי השמחה, ווען אין שפיץ וועט געפראוועט ווערן די שבת שבע ברכות בחצר הקודש קראלי וואו עס איז ערווארטעט א גרויסע ציבור געסט פון נאנט און ווייט.
