נאך א לענגערע צייט אפשניט וואס כ"ק אדמו"ר מקרעטשניף שליט"א פון ירושלים האט נישט געפראוועט א שבת אינעם עיר ואם בישראל בארא פארק, גרייט מען זיך אצינד אויף א לעכטיגע שבת שירה אין בארא פארק בצל הקודש פונעם רבי'ן שליט"א, ווען דער רבי נעמט אונטער א נסיעה קיין ניו יארק צו אויפטרייבן שטיצע לטובת ישיבתו הק' על טהרת הקודש ישיבת מבצר התורה קרעטשניף, המתנוסס לתפארה אין שטאט אלעד.
דעם רבינ'ס ישיבה איז אן אכסניא של תורה פאר פילצאליגע בחורים וואס שטייגן בתורה ועבודה, און געניסן פון א קירבה יתירה ביים נשיא הישיבה כ"ק אדמו"ר מקרעטשניף שליט"א פון י"ם וועלכער קומט כסדר אין ישיבה משפיע זיין פאר די תלמידים. אצינד נעמט דער רבי אונטער א מסע הקודש קיין ניו יארק צו באזוכן בבתי נגידים ותומכים, און אויפטרייבן גרויסע שטיצע צו קענען פינאנצירן די נאכאנאנדע הוצאות הישיבה.
בעוד שבוע ימים, קומענדיגע וואך פרשת בשלח אנהייב וואך, וועט דער רבי ארויספארן אין וועג קיין ניו יארק, דורכאויס די באזוך וואס וועט זיך פארציען פאר נאנט צו צען טעג, וועט דער רבי האבן די אכסניא אין שטוב פון הנגיד החסיד ר' שלמה גאלדשטיין הי"ו. מאנטאג פרשת יתרו וועט דער רבי באשיינען בראש השמחה ביי די חתונה פון א קינד ביי הנגיד החסיד ר' מיכל גאלדשטיין הי"ו מגדולי תומכי המוסדות, און מיטוואך פרשת יתרו וועט זיך דער רבי שליט"א אומקערן אהיים קיין ארץ ישראל לקראת חמשה עשר בשבט.
איבער אלעם ווערן געמאכט די גרויסע הכנות לקראת די שבת מרומם וואס דער רבי וועט אפרעכטן בתוככי העיר בארא פארק, מיט די באטייליגונג פון פילצאליגע תושבי העיר חסידים ואנשי מעשה, די גרויסע עטרת גאלדא זאל איז ספעציעל ארויסגעדינגען געווארן פאר די תפילות און טישן, די מעמד השירה ביים טיש ליל שבת קודש, ווען דער רבי זינגט פאר שירה אזוי ווי שביעי של פסח לכבוד שבת שירה, וואס איז ווי באקאנט פון די גרעסטע שבתים אין די קרעטשניפער הויף. אזוי אויך וועט דער רבי שליט"א אין א אויסנאמליכע שריט משמיע זיין דברות קודש ביי שלש סעודות, שטייענדיג אין סאמע ברען פון די ימי השובבי"ם.
