אלפי חסידי ברסלב באוויינען די ביטערע פארלוסט וואס איז געשאפן געווארן היינט זונטאג בעולם החסידות, מיט די פטירה בשיבה טובה פון הגאון החסיד המפורסם רבי נתן ליברמנש זצ"ל מגדולי המשפיעים אין ברסלב, אין עלטער פון אכט און אכציג יאר.
הגאון החסיד ר' נתן איז געווען פון די זקני המשפיעים, און פון זיין באשיידענעם שטוב איז ארויסגעגאנגען אוצרות השפעה בתורה וחסידות, רייכע שיעורים בכל חדרי התורה און חסידישע מאמרים וואס ער האט איבערגעגעבן פאר חסידיו ומעריציו ושומעי לקחו.
אלס בחור האט ער געלערנט אין ישיבת סלאבאדקע, און אויסער זיין התמדה בתורה וואס האט זיך אנגעזעהן אויף טריט און שריט, האט ער עוסק געווען בתורת החסידות אויף א טיפע פארנעם און זיך געווייקט ביי די פריערדיגע גדולי החסידים והמשפיעים אין ברסלב. ר' נתן האט אוועקגעשטעלט די ברסלב'ע קהילה אין עמנואל, און שפעטער האט ער זיך געצויגן קיין בית שמש, שטיל און באשיידן האט ער געדינט דעם אויבערשטן בתורה ועבודה און געווען א מוסטער פון עבודת השם בתמימות אונטער א שלייער פון פשטות.
זיינע שיעורים אין חסידות איז געווארן מיטגעהאלטן דורך טויזענטער אידן וואס האבן נהנה געווען פון אים עצה ותושיה, און פאר צענדליגע יארן איז ער געווען פאררעכנט צווישן די גאר חשובע משפיעים ביי וועם פילע האבן זיך געקלאמערט לאורו.
די לוויה איז פארגעקומען היינט נאכמיטאג ביים בית הלוויות שמגר אין ירושלים, דערנאך איז די לוויה ארויס פון די גרויסע ברסלב'ער שוהל אין מאה שערים, אויפן וועג צום הר המנוחות וואו ער איז געקומען לקבורה.
