מיט איבערראשונג און עקסטאז האבן אלפי חסידי סאטמאר אויפגענומען די נייעס אז קומענדיגן ל"ג בעומר הבעל"ט וועט געפראוועט ווערן א גרויסארטיגע מעמד הכנסת ספר תורה בחצר הקודש סאטמאר, ווען כ"ק אדמו"ר מסאטמאר שליט"א גיבט אריין א אייגענע ספר תורה וואס ער האט געלאזט שרייבן בהידור רב, לקיים מצוות כתבו לכם את השירה הזאת.
מיט ארום צוויי יאר צוריק האט כ"ק אדמו"ר מסאטמאר שליט"א אונטערגענומען דעם הייליגן פראיעקט צו לאזן שרייבן א ספר תורה, והיה כשבתו על כסא ממלכתו, וכתב לו את ספר משנה התורה הזאת. דער רבי האט אויסגעקליבן א סופר מומחה א ירא שמים און אים באאויפטראגט מיט די עבודת הקודש, און אצינד שטייט מען שוין אט אט ביים סיום הכתיבה, זיך גרייטענדיג צו ענדיגן דעם ספר תורה בשמחה וחדוה.
מיט עטליכע חדשים צוריק האט דער רבי שליט"א געמאלדן פאר די מקורבים איבער דעם אונטערנעמונג, און אצינד איז באשטעטיגט געווארן די גענויע פלענער ווען עס וועט פארקומען די מעמד הכנסת ספר תורה, באשטימט אויף דעם קומענדיגן יו"ט ל"ג בעומר הבא עלינו לטובה.
לויט די ערשטע פלענער וועט מאנטאג נאכט פרשת בהר בחוקותי ליל ל"ג בעומר פארקומען א גרויסארטיגע חגיגה "סיום כתיבת ספר תורה" במעמד אלפי חסידים ואנשי מעשה, קאמבאנירט מיטן עריכת שולחן הטהור לכבוד ל"ג בעומר, אין די גיגאנטישע דאגגעל גרינהאוז קאמפלעקס ביים ברוקלין נעווי יארד.
צומארגענס דינסטאג ביום ל"ג בעומר וועט פארקומען די היסטארישע מעמד הכנסת ספר תורה, ווען דער רבי שליט"א וועט אריינגעבן זיין אייגענעם ספר תורה צום גרויסן סאטמארער בית המדרש אויף ראדני סטריט, בית מדרשו של רבי וואס איז מקודש בקדושה של מעלה שוין צענדליגע יארן. די פרייליכע טענץ וועט פארקומען ברחובה של עיר, לענגאויס די גאסן פון בעדפארד עוועניו און ראדני סטריט, וואו עס וועלן זיך פארזאמלען די צענדליגע טויזענטער ילדי התשב"ר פון אלע סאטמארע חדרים לענגאויס אמעריקע און קאנאדע.
די סאטמארער עסקנים ארבעטן די טעג רונדע דעם זייגער אויסצוארבעטן אלע דעטאלן, זיך גרייטענדיג צו היסטארישע טעג בקורות ימי סאטמאר, בהילולת התנא האלקי רבי שמעון בר יוחאי, תורתו מגן לנו היא מאירת עינינו.
