א שיינע מעמד הנחת אבן הפינה איז פארגעקומען במעון הנופש פון כ"ק אדמו"ר מוויזניץ שליט"א לרפו"ש אין מושב אורה נעבן ירושלים, ווען עס איז געלייגט געווארן די גרונדשטיין פאר א נייע בנין בית המדרש "ישועות משה" דחסידי וויזניץ אין אשדוד, נאך עטליכע יאר פון ארבעט אויפן ביוראקראטישע פראנט צו קענען אויפבויען א שפאגל נייע בית המדרש לרווחת הציבור תושבי העיר.
די מעמד איז פארגעקומען מיט די באטייליגונג פון די חברי הקהילה אין אשדוד, וואס האבן זיך אנגעשלאסן מיט ריזיגע סכומים לטובת די בוי פראיעקט, צוערשט האט אויפגעטרעטן הרב דוב פאקשער הי"ו, און דערנאך האט מען געהערט א דרשה פונעם באקאנטן מגיד הרה"ג ר' פנחס ברייער שליט"א. דערנאך האט הרה"ח ר' בנציון טאבאק הי"ו פארגעזינגען גראמען, און דערנאך האט דער רבי שליט"א אריינגעלייגט דעם אבן הפינה, ווען די משתתפים הייבן זיך אין פרייליכע טענץ. דאן האט דער רבי שליט"א פארטיילט פאר די חשובע תומכים א ספעציעלע וויזניצע טלית מיט א מזכרת, און א ספעציעלע מתנה פאר די חשובע עסקנים וואס האבן געהאלפן דורכברעכן די נויטיגע פראצעדורן צו קענען פאראויסגיין מיט די בוי פראיעקט.
צום שלוס האט דער רבי שליט"א אויפגעטרעטן מיט דברות קודש, און ארויסגעברענגט לשבח די חשובע נדיבים. דערנאך האט אויפגעטרעטן הרה"ג ר' שלמה זלמן ווייס שליט"א רב הקהילה אין אשדוד, בשבחם פון די אינגעלייט חברי הקהילה וואס האבן זיך אנגעשטרענגט למעלה מכוחותם צו שאפן די נויטיגע געלטער פאראויסצוגיין מיט די בוי ארבעט.
