נעכטן אויפדערנאכט איז פארגעקומען א אייגענארטיגע שמחת השבע ברכות בחצר הקודש סאטמאר, נאכפאלגענדיג די שמחת החתונה פון א אייניקל ביי כ"ק אדמו"ר מסאטמאר שליט"א, מיט די חתן א אייניקל פון כ"ק אדמו"ר ממשכנות הרועים שליט"א. די שבע ברכות איז געווארן צוגעשטעלט דורכ'ן רבי'ן פערזענליך, ספעציעל געאייגענט פאר די יתומים פון די קהילה, פאר וועם דער רבי טוט זיך כסדר זארגן, אינערהאלב די בארימטע ארגענעזאציע "אור חדש".
די שבע ברכות איז פארגעקומען אין א פראכטפולע זאל אין וויליאמסבורג, וואו ביי רייך געדעקטע טישן האבן די קליינע קינדערלעך, די אריבער הונדערט יתומים, זיך געוואשן צום סעודת מצוה און זיך מיטגעפריידט מיטן רבינ'ס שמחה. עס האט אויפגעטרעטן דעם רבינ'ס איידעם הרה"ג ר' אלעזר טייטלבוים שליט"א אבי הכלה, און דער בארימטער בדחן ר' וועלוויל פעלדמאן הי"ו האט מהנה געווען מיט פאכמאנישע גראמען, באגלייט מיט חיזוק ווערטער פאר די טייערע קינדער.
דער סאטמארער רבי האט משמיע געווען דברות קודש פאר די קינדערלעך, און נאכן בענטשן האט מען זיך ארויסגעלאזט אין פייערליכע ריקודין, ווען דער סאטמארער רבי טאנצט מיט יעדע קינד, יעדע יתום באזונדער.
צום שלוס פונעם מעמד האט דער רבי פארטיילט כוס של ברכה פאר יעדן פערזענליך, צוזאמען מיט א גלאטע הונדערטער, בנדבת לבו פון הנגיד החסיד ר' יואל לאנדא הי"ו. אזוי אויך האט יעדעס קינד ערהאלטן א ספעציעלע מתנה, א הערליכע מצה טאש לכבוד יום טוב פסח, בנדבת לבו פון הנגיד החסיד ר' יעקב דוד ראטה הי"ו, אייגענטומער פון די בארימטע מפואר דזשודעיקא געשעפט.
