מיט גרויס פרייד איז היינט פארמיטאג פארגעקומען די שמחת הברית לבן הנולד ביי כ"ק אדמו"ר מסאדיגורא שליט"א, די צווייטע שמחה וואס דער רבי שליט"א פראוועט זינט ער איז נתעלה געווארן בכתר האדמורו"ת, די שמחה איז פארגעקומען אינעם גרויסן ביהמ"ד דחסידי סאדיגורא אויף רחוב גוטמאכר אין בני ברק.
מיט סנדקאות איז מכובד געווארן דער עלטער פעטער מרן פוסק הדור מרא דארעא קדישא שליט"א, וועם דער רבי שליט"א האט באזוכט במעונו אין נתניה פארלאפענעם דאנערשטאג, און מכבד געווען מיט סנדקאות. מיט ברכות וקריאת השם איז מכובד געווארן דעם רבינ'ס שווער הגה"צ ר' אשר חיים שטערנבוך שליט"א, ויקרא שמו בישראל "אליהו" נאכן עלטער זיידן הגה"צ ר' אלי' שטערנבוך זצ"ל ראב"ד אנטווערפן, איידעם פון הרה"ק בעל מקור ברוך מסערט ויזניץ זי"ע.
כ"ק אדמו"ר מוואסלוי שליט"א איז מכובד געווארן מיט עמידה לברכות, און נאכן ברית איז פארגעקומען די סעודת מצוה ברוב פאר והדר אין די גרויסע היכל הטישן נעבן ביהמ"ד הגדול סאדיגורא.
נעכטן אויפדערנאכט תיכף נאך הבדלה איז פארגעקומען די מעמד קריאת שמע ליינען אין היכל ביהמ"ד, געאייגענט פאר די ילדי תשב"ר, שפעטער ביינאכט איז פארגעקומען די סעודת הוואכנאכט און מלוה מלכה אין די גרויסע היכל הטישן, ביים שמחה האבן זיך אויך באטייליגט כ"ק האדמורי"ם מפיטסבורג, גארליץ, און ביאלא רמת אהרן, הגה"צ ר' חיים יצחק אייזיק לאנדא שליט"א גאב"ד מערב ב"ב, און הגה"צ ר' יעקב מאיר שטערן שליט"א דומ"ץ וויזניץ.
