אין בעפארברייטונג צו די היסטארישע מעמד חנוכת הבית פאר די נייע גיגאנטישע בנינים פון מוסדות באבוב אין בארא פארק, די נייע בנין התלמוד תורה בני ציון, און די נייע בנין בית חינוך לבנות בנות ציון, וואס קומט פאר דעם קומענדיגן זונטאג במקהלות אלפי חסידי באבוב, איז כ"ק אדמו"ר מבאבוב שליט"א אנגעקומען זונטאג נאכמיטאג אין די נייע בנין הת"ת, און קובע מזוזות געווען אויף די שערי הבנין.
די מעמד קביעת מזוזה איז פארגעקומען מיט די אנוועזנהייט פון א ענגע צאל נגידים ותומכים, וואס האבן זיך געלאזט קאסטן ריזיגע געלטער לטובת די אויפבוי פונעם נייעם בנין. נאכן מעמד איז פארגעקומען א מסיבת לחיים, און דערנאך האבן די נגידי המוסדות געהאט די געלעגנהייט צו קלאפן א מזוזה אין "זייער" קלאס, און אנדערע אפגעקויפטע זכותים.
אצינד גרייט מען זיך צו די היסטארישע חגיגה הגדולה מיט די באטייליגונג פון טויזענטער חסידי באבוב, די געהויבענע מעמד וועט פארקומען אין די גיגאנטישע זאל פון די ברוקלין נעווי יארד נעבן וויליאמסבורג, וואס ווערט אין די טעג איינגערישט צו אנטפאנגען דעם ריזן ציבור הנאספים. אין די זעלבע צייט וועט פארקומען א גייסטרייכע מעמד פאר די נשים צדקניות, אין די פראכטפולע זאלן פון דע פאלאס אין בארא פארק.
