פארגאנגענעם כ"ב אדר ב' האבן תלמידי וחסידי דושינסקיא אפגעצייכנט די יומא דהילולא קדישא פון כ"ק אדמו"ר הגה"ק מהרי"ם דושינסקיא זי"ע גאב"ד ירושלים עיה"ק, בצל הקודש פון בנו ממלא מקומו כ"ק אדמו"ר מדושינסקיא שליט"א.
זונטאג נאכט נאך מעריב האט דער רבי שליט"א פארגעלערנט משניות כנהוג, און דערנאך איז פארגעקומען א ספעציעלע מעמד מיט די בחורי הישיבות דחסידי דושינסקיא. מאנטאג אינדערפרי איז דער רבי אריינגעקומען צו תפילת שחרית ברוב עם הדרת מלך אין ביהמ"ד הגדול און געדאווענט פארן עמוד.
פארמיטאג איז דער רבי אנגעקומען צום הר הזיתים פוקד זיין דעם ציון הק' אין באגלייטונג פון הונדערטער חסידים, דער רבי האט פארגעזאגט פרקי תהלים און געליינט קוויטלעך. שפעטער פארנאכטס איז פארגעקומען די צענטראלע יארצייט טיש אין ביהמ"ד הגדול בית יוסף צבי דושינסקיא אויף רחוב שמואל הנביא, מיט די באטייליגונג פון הונדערטער חסידים ותלמידים.
ביים טיש איז אויך געפראוועט געווארן די שמחת השבע ברכות פון א אייניקל ביי הגה"צ אבד"ק דושינסקיא בית שמש שליט"א, עס האבן זיך באטייליגט די שרי התורה חברי הביד"ץ העדה החרדית, הגה"צ אבד"ק לימינוב שליט"א א שוואגער פון רבי'ן, ובראשם הגה"צ ר' יעקב מאיר שעכטער שליט"א, פאר וועם דער דושינסקיא רבי האט אוועקגעגעבן זיין בענקל. הרה"צ ר' יעקב מאיר האט אויפגעטרעטן מיט דברות קודש, און נאכן בענטשן האט מען געטאנצן לכבוד די שמחה.
