פארלאפענעם דינסטאג איז פארגעקומען א ספעציעלע מעמד כבוד התורה אין די בארימטע בית אולפנא לרבנן "כולל דברי אש" אין בארא פארק, וואו עס איז געפראוועט געווארן די מעמד אדיר ומפואר, מסיבת סיום אויף הלכות מקוואות וואס איז געלערנט געווארן מיט גרויס התמדה אין די לעצטערע חדשים.

די מעמד איז פארגעקומען אין די פראכטפולע פרימיער זאל אין בארא פארק, קאמבאנירט מיט די חגיגת התחלת כתיבת ספר תורה, ככלות י"ב חודש צו די פטירה פונעם לעגענדארן בעל מנגן הרב החסיד ר' מיכאל שניצלער ע"ה, דורכאויס די מעמד איז געזינגען געווארן אומפארגעסליכע ניגונים פון ר' מיכאל, פאכמאניש אראפגעזינגען דורך די בארימטע שירה כאר, די יונגערליך קינדער כאר, ר' פנחס מרדכי וועבער, ר' מאטי איליאוויטש, און ר' הערשי וויינבערגער.

די מעמד איז פארגעקומען אין שפיץ פון הגה"צ ר' געציל בערקאוויטש שליט"א דומ"ץ קרית יואל ובעל אגלי דבש וועלכער האט איבערגעגעבן די תעודות פאר די חברי ורבני הכולל, מען האט געהערט דרשות פון הרה"ג ר' מרדכי יעקב ראזען שליט"א, דער מנהל הכולל הר"ר נחום שווארץ הי"ו, הרה"ג ר' יואל פריעדמאן שליט"א אב"ד עדת חסידים, הר"ר זושא שניטצלער הי"ו זון פון הרה"ח ר' מיכאל ע"ה, הגה"צ ר' שמעון זאב מייזליש שליט"א רב ביהמ"ד ישמח משה אין קרית יואל, און הרה"ג ר' יעקב מיללער שליט"א אב"ד יארמע.

אויך האבן זיך באטייליגט מערערע אדמורי"ם ורבנים, צווישן זיי כ"ק אדמו"ר מטאהש שליט"א, כ"ק אדמו"ר מוויזניץ שליט"א פון ירושלים, כ"ק אדמו"ר מוויזניץ שליט"א פון בארא פארק, כ"ק אדמו"ר מתולדות צבי ספינקא שליט"א, כ"ק אדמו"ר מניקלשבורג שליט"א, כ"ק אדמו"ר מספינקא מאנסי שליט"א, הגה"צ אבד"ק סיגעט שליט"א בן כ"ק אדמו"ר מסאטמאר שליט"א, הגה"צ ר' יחזקאל אונגער שליט"א בן כ"ק אדמו"ר מבאבוב 45 שליט"א, הגה"צ אב"ד ברעזאן שליט"א, הגה"צ אב"ד ביקאווסק שליט"א, הגה"צ אב"ד דראהביטש שליט"א, און נאך פילע רבנים ואישי ציבור.