הונדערטער חסידי וויזניץ האבן זיך נעכטן נאכמיטאג מיטגעפריידט בשמחת התורה, ביי די מעמד הכנסת ספר תורה וואס איז אריינגעגעבן געווארן צום היכל ביהמ"ד הגדול דקהל תורת חיים וויזניץ אין בארא פארק, לזכר נשמתו פון כ"ק אדמו"ר הרה"ק בעל תורת מרדכי מוויזניץ זי"ע, די ספר תורה איז געשריבן געווארן דורך די תומכים פון כולל אמרי חיים וויזניץ, ובראשם הנגיד החסיד ר' אברהם שלמה איינהארן הי"ו ראש הקהילה.
אין די נאכמיטאג שעה'ן איז כ"ק אדמו"ר מוויזניץ שליט"א אנגעקומען צום היכל הכולל וואס איז סטאנציאנירט אין ביהמ"ד מארגערעטען אויף די פערצנטע עוועניו, דער רבי האט אריינגעשריבן די לעצטע אותיות, און דערנאך ארויסגעפירט די ספר תורה לרחובה של עיר בתופים ובמחולות, די גאנצע וועג האט דער רבי באגלייט די חופה מיט די ספר תורה, און מכבד געווען די חשובע תומכים ופני העדה צו טאנצן מיט די תורה.
אנקומענדיג אין ביהמ"ד האט דער רבי אריינגעפירט די ספר תורה אינעם פול געפאקטן היכל ביהמ"ד, נאכן טאנצן א שטיק צייט האט דער רבי געטאנצן אינאיינעם מיטן ראש הקהל ר' אברהם שלמה איינהארן הי"ו פטרון הכולל, און דערנאך פארגעזאגט די מזמורים כנהוג.
שפעטער אויפדערנאכט איז פארגעקומען די סעודת מצוה לכבודה של תורה אינעם היכל בית המדרש, אינאיינעם מיט די סעודת הילולא לרגל די יומא דהילולא קדישא פון כ"ק אדמו"ר הרה"ק מוויזניץ זי"ע, אלס נואם הכבוד האט אויפגעטרעטן הגה"צ ר' יחיאל מיכל שטיינמעטץ שליט"א דומ"ץ סקווירא ב"פ, און דער רבי שליט"א האט אויפגעטרעטן מיט דברות קודש. נאכן בענטשן איז פארטיילט געווארן די תעודות פאר די חברי ורבני הכולל, וואס האבן זיך פארהערט אויף גאנץ הלכות שבת און הלכות טהרה.
