די אידישע קאמיוניטי באורד 12 וואס פארטרעט דעם היימישן ציבור אין בארא פארק, האט פארגאנגענעם מאנטאג אפגעהאלטן זייער יערליכע זיצונג מיט די לאקאלע אויטאריטעטן אין ניו יארק סיטי, צו דורכשמועסן פארשידענע אקטועלע נושאים שטייענדיג אין די ערב פסח טעג.
די מיטינג קומט צושטאנד יעדעס יאר אין די ערב פסח טעג, כדי צו אריינברענגען די שטאטישע באעהרדע און די גאסן פארזארגערס אין די אידישע ערב יום טוב לופט, ווען טויזענטער גייען איינקויפן אין אלע שעות אין טאג, טראפיק איז פיל מער ווי געווענליך, מענטשן רייניגן און ווארפן ארויס גרויסע שטיק מיסט און דאס גלייכן.
עס איז אויסגעשמועסט געווארן איבער פארמערטע סאניטאציע סערוויס, ספעציעל אינעם טאג פון ערב פסח ווען עס וועט זיין צוגעשטעלט א ספעציעלע טעלעפאן ליניע מיט אינפארמאציע פון די גארבעדזש פיקאפס. אזוי אויך איז באשטעטיגט געווארן די לאקאציעס וואו עס וועלן פארקומען פייערן פאר שריפת חמץ, און נאך פארשידענע זיכערהייט טעמעס וואס ווערט אויסגעשמועסט אין דעם געלעגנהייט.
