די שטאט לאנדאן האט פארגאנגענע וואך בייגעוואוינט א היסטארישע מעמד, ווען עס זענען זיך צוזאמגעקומען טויזענטער תושבי העיר זקנים עם נערים, און זיך דערווארעמט די הערצער נענטער צו ווערן צום אויבערשטן, און שטיין פעלזן פעסט כחומה בצורה קעגן די נסיונות הדור די פגעי הטעכנעלאגיע.
די ריזן מעמד "קימו וקבלו" איז פארגעקומען אין שפיץ פונעם חשובן גאסט הגה"צ ר' צבי מאיר זילבערבערג שליט"א ראש חבורת נחלת יעקב וועלכער איז אנגעקומען אויף א געהויבענע באזוך אין שטאט, כדי צו קענען אקאמאדירן דעם ריזן ציבור איז אויפגעשטעלט געווארן צוויי ריזיגע שאטערס איינס באהאפטן צום אנדערן, אויפן גיגאנטישן שטח פון תלמוד תורה יסודי התורה, וואו מען האט אויסגענוצט יעדעס ביסל פלאץ צו קענען ארייננעמען וואס מער. טראץ די פילע איינריכטונגען פון טויזענטער זיץ פלעצער און הויכשטאקיגע פארענטשעס פון אלע זייטן, איז נאך אלס נישט געווען מעגליך צו פלאצירן יעדן איינעם, און הונדערטער אידן זענען געשטאנען אויף די גאסן ארום און מיטגעהאלטן דורך די הויכהילכערס אויפן גאס.
אויפן בימת הכבוד האט זיך אנגעזעהן אלע אדמור"י ורבני העיר, ווען אויף א העכערע פלאטפארמע שטייט הגה"צ המשפיע ר' צבי מאיר שליט"א און טרעט אויף מיט פייערדיגע דיבורים כדרכו בקודש. עס האבן זיך באטייליגט כ"ק אדמו"ר מוויזניץ שליט"א, הגה"צ ר' משה מנחם ווייס שליט"א הגה"צ ר' יוסף פאדווא שליט"א ראש הדיינים, הגה"צ ר' שלום פריעדמאן שליט"א סגן אב"ד, הגה"צ אב"ד סאטמאר, דייני קהילת בעלזא, דייני קהילות סאטמאר, דומ"ץ באבוב, דומ"ץ סקווירא, רו"מ באבוב 45, דומ"ץ צאנז, אב"ד פשעווארסק, אב"ד וויזניץ, אב"ד סלאנים, אב"ד הענדאן, אב"ד ביקאווסק, אב"ד פרעשבורג, אב"ד צעירי אגודת ישראל, אב"ד אורייתא, אב"ד נייטרא, האדמו"ר מסטאניסלאוו, ראש ישיבת תורת חסד, ראש ישיבת גור, און נאך פילע רבנים ומורי הוראה.
די גרויסארטיגע מעמד איז פארגעקומען מאנטאג פרשת שמיני, עטליכע טעג פריער דאנערשטאג אויפדערנאכט איז פארגעקומען א גרויסארטיגע מעמד אין ביהמ"ד הגדול דקהל יטב לב ד'סאטמאר אויף קלעפטאן קאממאן, וואו הגה"צ ר' צבי מאיר שליט"א האט אויפגעשטורעמט די הערצער צו שטיין פעלזן פעסט כחומה בצורה קעגן די נסיונות הדור.
אין לויף פון די וואך האט הגה"צ ר' צבי מאיר שליט"א אפגעשטאט באזוכן בבתי אדמור"י ורבני העיר, שבת קודש האט ער געפראוועט אויף א ריזן פארנעם אין די זאלן פון יסודי התורה, מיט די באטייליגונג פון טויזענטער תושבי העיר.
