אין די יעצטיגע טעג איז אריין אין קראפט א נייע ארגענעזאציע פאר חסידי סקווירא, "מפעל להחיות" וואס איז אוועקגעשטעלט געווארן ארויסצוהעלפן אלמנות און יתומים אינערהאלב די קהילה, על כל צרה שלא תבוא.
די ארגענעזאציע איז געגרינדעט געווארן בברכתו ובעידודו פון כ"ק אדמו"ר מסקווירא שליט"א, און דורכאויס די לעצטע פאר וואכן איז פארגעקומען מערערע אסיפות צווישן די וועד העסקנים, וועד הרבנים, און וועד הפועל, צו אוועקשטעלן די פונקטליכע פלענער וויאזוי די ארגענעזאציע וועט ארבעטן, אנגעהויבן מיט די ערשטע טויזענט מענטשן וואס וועלן זיך איינשרייבן, און מיט דעם וועט די ארגענעזאציע ווערן אוועקגעשטעלט אלס א פאקט, ווען אין פאל עס ווערט נעדר ח"ו א חבר אינעם מפעל, וועלן אלע מיטגלידער איינלייגן א סכום געלט צו שטעלן די משפחה אויף די פיס.
דעם דינסטאג איז פארגעקומען די אפיציעלע מעמד התייסדות המפעל אין ביהמ"ד הגדול אין שיכון סקווירא, די מעמד איז באשיינט געווארן דורך די קינדער פון כ"ק אדמו"ר מסקווירא שליט"א, און מען האט געהערט וויכטיגע דרשות מפי מגידים ורבנים, פון הרה"ג ר' אברהם שפיטצער שליט"א דומ"ץ סקווירא לעיקוואד רב הקופה, און א ברכת הקודש פונעם סקווירא רבי'ן איבערגעגעבן דורך הגה"צ ר' יוסף ישראל אייזענבערגער שליט"א דיין אין שטעטל. אזוי אויך האט מען געהערט א באריכט פון די וואוילטעטיגע מפעל "הבן יקיר" פון חסידי באבוב, דורכ'ן לעגענדארער באבובער משמש הרב אפרים בורנשטיין הי"ו.
תיכף נאך די אסיפה האט זיך געעפנט די הרשמה, ווען הונדערטער חסידים זענען געקומען זיך איינשרייבן אלס מיטגלידער אין דעם הייליגן מפעל, די ציפער חברים האלט שוין נאנט צו טויזענט, און אין די קומענדיגע טעג וועלן די עסקנים ארומפארן איבער אלע שטעט צו מזכה זיין חסידי סקווירא זיך אנצושליסן אין דעם מפעל.
