דעם דאנערשטאג נאכט איז פארגעקומען א ספעציעלע אסיפה לקראת די גרויסע קאמפיין "כוננהו" אוועקצושטעלן די קהילה קדושה פון חסידי סאטמאר אין קרית יואל, צו די אסיפה זענען געלאדנט געווארן די עלטערע אידן זקני וחשובי הקהילה, וועלכע האבן זיך אונטערגענומען אריינצוברענגען גרויסע סכומים און זיין א לעבעדיגע ביישפיל ארויסצוהעלפן די בליה און וואוקס פון די קהילה.
ווי באקאנט איז די סאטמארע קהילה אין קרית יואל ווידער ארגענעזירט געווארן מיט נאנט צו צוואנציג יאר צוריק, און דורכאויס די לעצטע פאר יאר איז עס דראסטיש געשטיגן מיט פרישע בתי מדרשים און מוסדות התורה אויף א מאסיווע פארנעם. אצינד האבן די עסקנים געלאזט אין גאנג א גרויסארטיגע קאמפיין אויפצוטרייבן גרעסערע געלטער צו פארזיכערן די עתיד פון די קהילה און עס אוועקשטעלן על מכונו.
אין בעפארגרייטונג צו די גרויסע קאמפיין איז דעם דאנערשטאג פארגעקומען א גרויסע אסיפה ספעציעל פאר די עלטערע אידן חברי הקהילה תושבי קרית יואל, עס האט אויפגעטרעטן הגה"צ אבד"ק סאטמאר ירושלים שליט"א, און דער באגאבטער רעדנער הרב מאיר מרדכי בערקאוויטש הי"ו, דערנאך זענען אלע מסובים אריבער ביים רב אונטערשרייבן די שטרי קבלה.
