מיט גרויס צער און טרויער קומט אן די ביטערע בשורה איבער די פטירה בשיבה טובה פון הרבנית צפורה פייגא אלתר ע"ה, מחברתו הטהורה פון כ"ק אדמו"ר הרה"ק בעל פני מנחם מגור זי"ע, אין טיפן עלטער פון 98 יאר.
די רעבעצין איז געווען א טאכטער פון הגה"צ ר' אברהם מרדכי אלתר זצ"ל, זון פון הגה"צ ר' משה בצלאל זצ"ל, א זון פונעם הייליגן שפת אמת פון גור זי"ע. זי איז אויפגעוואקסן אין דער אלטער היים אין גור אין פוילין, אדורכגעמאכט די ביטערע מלחמה יארן און דערנאך אויפגעשטעלט דעם הערליכן שטוב בארץ הקודש, קינדער און אייניקלעך זרע ברך ה'.
אלע יארן איז זי געשטאנען לימין הקודש פון איר גרויסן מאן דער גערער רבי זצ"ל דער פני מנחם, סיי אין די פריערדיגע יארן ווען ער האט משמש געווען אלס ראש ישיבת שפת אמת, און סיי שפעטער ווען ער איז נתעלה געווארן בכתר האדמורו"ת, נאכן הסתלקות פון אחיו הגדול הרה"ק דער לב שמחה פון גור זי"ע.
די רעבעצין ע"ה לאזט איבער א הערליכע דור, בנין וחתנין רבנן ומרביצי תורה. די זיהן הגאון החסיד ר' יעקב מאיר אלתר שליט"א, הגאון הגדול ראש הישיבה רבי שאול אלתר שליט"א, הגאון הגדול ר' יצחק דוד אלתר שליט"א ראה"כ להוראה דחסידי גור אין בני ברק, און הגאון הגדול ר' דניאל חיים אלתר שליט"א ראש ישיבת פני מנחם.
