נאך די פיר גרויסע לוויות פון הגה"צ אבד"ק אמונת ישראל זצ"ל, זונטאג צופרי אין סקווירא שטעטל, פארמיטאג ביי ישיבה ומתיבתא תורה ודעת אין פלעטבוש, מיטאג צייט בהיכל בית מדרשו קהל אמונת ישראל אין בארא פארק, און מאנטאג נאכמיטאג ברחובות העיר ירושלים, איז שפעט מאנטאג נאכמיטאג פארגעקומען די לוויה און מעמד הקבורה אויפן אלטן בית עלמין אין טבריה.
ארום זעקס דרייסיג נאכמיטאג אין ארץ ישראל איז די מיטה אנגעקומען קיין עיר הקודש טבריה, נעבן די אלטע קארלינער שוהל נישט ווייט פון די בית עלמין. הגאון הגדול רבי שמואל דישון שליט"א ראש ישיבת קארלין סטאלין אין בארא פארק ידיד נעוריו פונעם גרויסן נפטר זצ"ל האט אויפגעטרעטן מיט דברי הספד, דערנאך האבן די צוויי זיהן הרה"ג ר' אברהם יצחק שליט"א אבד"ק אמונת ישראל אין מאנסי, און הרה"ג ר' צבי אלימלך שליט"א געזאגט קדיש, און מען האט ארויפבאגלייט די מיטה צופיס ביז צום אלטן בית החיים, וואו דער גרויסער נפטר איז געקומען לקבורה במעמד אלפי ישראל.
