היינט דינסטאג אינדערפרי האט געלאנדעט די פליגער מיט די מיטה פון כ"ק אדמו"ר מזידטשויב שיקאגא זצ"ל אין די לוד לופטפעלד אין ארץ ישראל, און ארום האלב נאך ניין האט זיך אנגעהויבן די מסע הלוויה פארנט פון ביהמ"ד הגדול דחסידי באיאן אויף רחוב מלכי ישראל אין ירושלים.
בראש המלווים האט זיך אנגעזעהן כ"ק אדמו"ר מבאיאן שליט"א א מחותן, כ"ק אדמו"ר מוויזניץ שליט"א א שוואגער, כ"ק האדמורי"ם מסטראפקוב, טריסק, שומרי אמונים, ראזלא, באסטאן, און הגה"צ ר' מנחם ארנסטר שליט"א ראש ישיבת וויזניץ א מחותן.
דער שוואגער כ"ק אדמו"ר מוויזניץ שליט"א האט אויפגעטרעטן מיט דברי הספד, און אזוי אויך דער יונגסטער זון הגה"צ ר' זלמן לייב אייכענשטיין שליט"א אבד"ק זידטשויב שיקאגא, איידעם ביי כ"ק אדמו"ר מבאיאן שליט"א. דערנאך האבן די קינדער געריסן קריעה און געזאגט קדיש, און א גרויסע ציבור האט באגלייט דעם רבי'ן למנוחות ביזן הר הזיתים, וואו דער רבי זצ"ל איז געקומען לקבורה סמוך לקברי אבותיו הקדושים.
די קינדער פון רבי'ן הרבנים הגאונים שליט"א זענען געזעסן שבעה היינט נאכמיטאג אין ירושלים, און יעצט ביינאכט אין ארץ ישראל פארן זיי ארויס אויפן וועג צוריק קיין שיקאגא, וואו זיי וועלן זיצן שבעה בביתו נאוה קודש פונעם רבי'ן זצ"ל ביז דעם קומענדיגן מאנטאג.
