הונדערטער וויזניצע חסידים האבן זיך דעם זונטאג מיטגעפריידט ביי די פרייליכע מאורע אין שטאט מאנסי, שמחה משולשת ווען עס איז געפראוועט געווארן די לאנג ערווארטעטע מעמד חנוכת הבית פאר די נייע בנין ביהמ"ד קהל צמח צדיק וויזניץ אויף פרענסיס, אינאיינעם מיט די מעמד הכנסת ספר תורה להיכל ביהמ"ד החדש, קאמבאנירט מיט די שמחת השבע ברכות פון א אור אייניקל ביים רבי'ן.
שטייענדיג גאנצע צען יאר נאך וואס עס איז געלייגט געווארן די אבן הפינה אין יאר תשע"ד, איז געפייערט געווארן די מעמד חנוכת הבית, טראץ וואס איבער צוויי יאר צוריק האט מען זיך שוין אריינגעצויגן אינעם נייעם בנין, איז עס אבער נאכנישט געווען גענצליך פארטיג ביז יעצט, ווען די בנין איז כלול בהדרו ווי עס פאסט פאר א בית מקדש מעט.
דער נדבן הדגול הנגיד הנכבד ר' יהודה יעקב כהנא הי"ו וועלכער האט א באדייטענדע טייל אין די געבוי פונעם נייעם ביהמ"ד, האט אין די זעלבע צייט געפראוועט א מעמד הכנסת ספר תורה וואס ער האט מנדב געווען פאר די ביהמ"ד, און די סעודה לגומרה של תורה איז געפראוועט געווארן צוזאמען מיט די צענטראלע שבע ברכות פון א אור אייניקל ביים רבי'ן, אייניקל פון זיין איידעם הגה"צ ר' יצחק טווערסקי שליט"א בן גיסו כ"ק אדמו"ר מסקווירא שליט"א.
א לענגערע צייט האט מען זיך מיטגעפריידט ביי די לעבעדיגע ריקודים, א ספעציעלע פלאטפארמע איז געווארן אויפגעשטעלט אין צענטער פון היכל וואו דער רבי האט געטאנצן מיט די ספר תורה און געהויבן דעם ציבור העכער און העכער. דער רבי האט פארגעזאגט קאפיטל לדוד מזמור, און מכבד געווען בנו הגדול הגה"צ אב"ד קרית וויזניץ ב"ב שליט"א צו פארזאגן מזמור לדוד.
דורכאויס די מעמד האבן זיך אנגעזעהן דער זיידע פון חתן כ"ק אדמו"ר מראחמיסטריווקא מאנסי שליט"א, כ"ק אדמו"ר מראחמיסטריווקא ספרינג וואלי שליט"א, הגה"צ ר' ישראל דוד שלעזינגער שליט"א אב"ד שערי תפלה, הגה"צ ר' יעקב יוסף האגער שליט"א בן כ"ק אדמו"ר מוויזניץ שליט"א פון מאנסי, עס האט אויפגעטרעטן הרה"ח ר' מרדכי חנא כהנא הי"ו מגדולי עסקני הקהילה, הרה"ג ר' מרדכי בערגער שליט"א דיין אין די קהילה, דער נדיב הנגיד החסיד ר' יהודה יעקב כהנא הי"ו, הרה"ג ר' חיים מאיר בערגער שליט"א ראש הכולל, און בהמשך הסעודה האט מען פארגעזעצט מיט לענגערע טענץ בשלהבת אש קודש.
ביים סעודה האט דער רבי אויפגעטרעטן מיט דברות קודש בענינא דיומא, איבער די חנוכת הבית און הכנסת ספר תורה, אזוי אויך האט דער רבי ארומגערעדט איבער די שווערע אבידה מיט די הסתלקות פון שאר בשרו כ"ק אדמו"ר מקאסוב זצ"ל וועם מען האט פריער אין טאג באגלייט למנוחות.
