מיט גרויס צער און טרויער ווערט אויפגענומען די שווערע בשורה, איבער די פטירה פון הגאון הצדיק חסידא ופרישא, ר' שמעי' גרינבוים זכר צדיק לברכה, בעל מחבר ספרי סייעתא דשמיא אויף משניות, און גלאררייכער מרביץ תורה און מגיד שיעור רבות בשנים אין קהל יטב לב ד'סאטמאר, וועלכער איז דעם שבת נפטר געווארן אין עלטער פון 77 יאר.
הגה"צ ר' שמעי' גרינבוים זצ"ל, איז געווען פון די שענסטע תלמידים אין סאטמאר, תלמיד אהוב וחביב ביי כ"ק הרה"ק מסאטמאר זי"ע ביי וועם ער האט גענאסן א קירבה יתירה, ער איז געווען פון די פני העדה זייענדיג פון די חשובע משפיעים, יארן לאנג פלעגט ער פארלערנען שיעורים אויף א טעגליכע פארנעם, עטליכע מאל א טאג אין פארשידענע מקצועות בתורה, דרשות בענינא דיומא און אינהאלטסרייכע שמועסן. איבערהויפט איז ער געווען באקאנט מיט זיין פייערדיגע קנאות בדרך רבו הגדול, אויפפלאמענדיג אידישע הערצער בדעת תורה הצרופה.
יארן לאנג איז ער געווען פון די חשוב'סטע רבנים אין וויליאמסבורג, קרואי מועד אנשי שם, פון די געשעצטע מסובים ביי יעדע מסיבה און אסיפה פאר רבנים, ער איז געווען א דולה ומשקה מתורת רבו לאחרים, פה מפיק מרגליות ומלהיב לבבות ישראל, און זיינע קלארע ספרים און חיבורים זענען אנגענומען איבער די גאנצע וועלט, וואו טויזענטער אידישע קינדער זענען עוסק דערין בהתמדה רבה.
די לעצטע פאר יאר האט ער זיך זייער געמוטשעט ל"ע מיט די ביטערע מחלה ה"י, איבערהויפט אין די לעצטע פאר וואכן ווען ער איז געווען אין זייער א שווערע צושטאנד, ביז צו זיין פטירה לחיי העולם הבא דעם שבת קודש, לדאבון לב אלפי תלמידיו ומעריציו וכל בית ישראל.
ער לאזט איבער א הערליכע דור ישרים יבורך, חשובע קינדער און אייניקלעך בנין וחתנין רבנן, צווישן זיינע איידימער ציילט זיך הגה"צ גאב"ד קראסנא שליט"א.
