היינט מיטוואך ווערט ווידעראמאל אפגעצייכנט היסטאריע אין סאטמאר מיטן ברייטפארצווייגטן זה מזה פראיעקט, זיך ארויסצוהעלפן איינער דעם אנדערן אין פרנסה אנגעלעגנהייטן, ביים גרויסארטיגן סאטמארער ביזנעס עקספאו וואו עס קומען זיך צוזאם הונדערטער ביזנעסלייט און טויזענטער חסידים, מקיים צו זיין דעם וחי אחיך עמך.
כמעשהו בראשונה ובשניה, כך מעשהו בשלישיה, צום דריטן מאל אין א רייע ווען חסידי סאטמאר צייגן ארויס אפענע הענט צו זיך העלפן איינער דעם אנדערן, מען שלאגט פאר פרישע ביזנעס געדאנקען און מען טרעפט פרישע ביזנעס שותפים און האנדלער. דאס אלעס קומט פאר אונטער די דירעקטע השפעה פון א געלונגענע שטאב עסקני הקהילה, אין פערזענליכע צוזאמענארבעט פון די ראשי הקהילה והמוסדות אינערהאלב די מלכות'דיגע סאטמארע אימפעריע.
דאס אלעס ווערט אהערגעשטעלט אונטער איין דאך, אין די ניו דזשערסי קאנווענשן און עקספאו צענטער, וואו הונדערטער ביזנעסער זענען רייך אויסגעשטעלט צו געבן א גוטן איינדרוק און שאפן פאטענציאלע קאסטומערס אינערהאלב די סאטמארע קהילה, צו העלפן א צווייטן איד, און מיט דעם זיך אליין ארויסהעלפן אין אן עקאנאמישן שטאנדפונקט.
אויסער דעם ווערט צוגעשטעלט א רייע אינהאלטסרייכע לעקציעס און שמועסן דורך וועלט בארימטע מומחים אין די ביזנעספעלד, א באזונדערע לאקאציע פאר מניני מנחה פאר די טויזענטער באטייליגטע, און א באזונדערע לאקאציע צו טועם זיין און זיך דערכאפן דאס הארץ מיט הרחבת הדעת.
