א רירנדע מאמענט פון יציקת היסודות איז פארגעקומען פארלאפענע וואך בחצר הקודש טשערנאביל, אין ראם פון די מאסיווע פראיעקט אויפצובויען דעם נייעם הערליכן בית המדרש הגדול דחסידי טשערנאביל לשם ולתפארת.
די נייע בית המדרש איז ב"ה הולך ונבנה אויף א טעגליכע פארנעם, די קאנסטרוקציע ביים שטח הבניה אויף די איין און פערציגסטע סטריט נעבן די צוועלפטע עוועניו, זעהט זיך אן אין פולן שוואונג, צעמענט טראקס און טעטיגע ארבייטער, בוי פירמעס און קאנטראקטער, עס קומען און גייען טאג טעגליך פילע עובדים וואס זענען מנצח על מלאכת בית השם, צו באגלייטן די בוי ארבעט לשם ולתפארת.
אין די יעצטיגע טעג איז מען אריין אין א נייע שלב אין די בוי ארבעט, ווען עס איז געגאסן געווארן די יסודות פון די מזרח וואנט פונעם נייעם בית המדרש, און לכבוד די גרויסע דערגרייכונג איז פארגעקומען די יציקת היסודות אויף א באשיידענע פארנעם, מיט די פערזענליכע השתתפות פונעם געטרייען מנהיג כ"ק אדמו"ר מטשערנאביל שליט"א וועלכער האלט מיט פונדערנאנט די ערנסטע פארשריט אין די מלאכת הבניה.
די יציקת היסודות איז פארגעקומען פארלאפענע וואך מאנטאג ביום המסוגל חמשה עשר באב, ווען דער רבי שליט"א איז אנגעקומען אין די מיטאג שעות אין באגלייטונג פון א געקליבענע צאל נאנטע מקורבים, בניו הרבנים הגאונים שליט"א, ראשי ועסקני קרן הבנין, און א צאל תומכים נכבדים פון די קהילה קדושה.
דער רבי האט פארגעזאגט פרקי תהלים בהתעוררות רב. דערנאך האט דער רבי אריינגעלייגט שטיינער און מטבעות, און עטליכע שטיינער פון די היסטארישע בית המדרש פון הרה"ק רבי אהרן מטשערנאביל זי"ע אין שטאט טשערנאביל. אזוי אויך האט דער רבי אריינגעלייגט אלטע און היסטארישע מטבעות לשמירה ולהצלחה.
דערנאך האט דער רבי מכבד געווען צו גיסן בניו הרבנים הגאונים שליט"א, עטליכע נגידים ותומכים און פאר די חברי וועד קרן הבנין.
דערנאך איז פארגעקומען א מסיבת לחיים לכבוד המאורע, בביתו נאוה קודש פון כ"ק אדמו"ר מטשערנאביל שליט"א מיט די באטייליגונג פון א ענגע צאל נגידים און חסידים, דער רבי האט פארטיילט לעקאך פאר אלע אנוועזנדע און מען האט געזינגען ניגוני שבח והודאה. דאן האט דער רבי אויפגעטרעטן מיט קורצע דברות קודש, און געוואונטשן אז מען זאל שוין בקרוב קענען אריינגיין אין די נייע בית המדרש כלול בהדרו.
