נעכטן מוצאי שבת קודש ביים גרויסארטיגן מעמד מכונך והיכלך, צו פייערן די חנוכת הבית פון די נייע גרויסע היכל אלטר יחזקאל ביהמ"ד סאטמאר אין קרית יואל, האט דער ראש הקהל הנגיד החסיד ר' מענדיל שוויממער הי"ו געמאלדן די איבערראשנדע נייעס, אז אין א ערשטמאליגע פארנעם וועט כ"ק אדמו"ר מסאטמאר שליט"א קומען קיין קרית יואל אפרעכטן די תפילות יום הקדוש בהתעוררות רב, בקרב תלמידיו וחסידיו תושבי העיר.
די היסטארישע נייעס איז געמאלדן געווארן ביים ענדע פון א פרייליכע יומא אריכתא, צוויי טעג מעת לעת פון רגשי הודאה וחדוה, אנגעהויבן פונעם גרויסן יארצייט טיש כ"ו אב דאנערשטאג נאכט במקהלות אלפי ישראל, ווען מען האט צום ערשטן מאל באנייעט די ריזן היכל בית המדרש החדש וואס איז געבויעט געווארן אין א בליץ שנעלקייט פון בלויז געציילטע וואכן. עס האט נאכגעפאלגט מיט א זעלטן געהויבענע שבת בצל הקודש ווען די ביהמ"ד איז געווען איבערגעפולט עד אפס מקום דורכאויס די תפילות און טישן.
מוצאי שבת קודש במוצאי מנוחה איז געפראוועט געווארן די התרגשות'דיגע מעמד "מכונך והיכלך", מעמד חנוכת הבית בשירה וזמרה, בקול צהלה ורנה והמון חוגג, א לענגערע צייט האט מען זיך מיטגעפריידט מיט לעבעדיגע טענץ לכבוד המאורע, דער רבי שליט"א האט געטאנצן מיט בנו הגדול הגה"צ אבד"ק סאטמאר ירושלים שליט"א וועלכער שטייט אין שפיץ פון די קהילה, און א ספעציעלע טאנץ מיטן לעגענדארער נדבן בונה ומקים פונעם נייעם היכל הנגיד החסיד ר' יחזקאל'ע גליק הי"ו, וועלכער האט אויך אויפגעטרעטן מיט א דרשה און איבערגעגעבן זיינע אינערליכע הרגשים.
דער רבי שליט"א האט געוואונטשן לחיים און אויפגעטרעטן מיט א קורצע ברכת הקודש, בנו הגדול הגה"צ דער רב הקהילה שליט"א האט אויפגעטרעטן מיטן משא המעמד, און עטליכע ראשי ועסקני הקהילה האבן אויפגעטרעטן מיט די דבר הקהילה, ווען צום הויכפונקט האט דער ראש הקהל אויסגערופן בשער בת רבים דאס וואס די הנהלת הקהילה האט איינגעלאדנט דעם רבי'ן שליט"א צו קומען פראווענען יום הקדוש אין קרית יואל, און דער רבי האט טאקע אנגענומען די איינלאדענונג.
דערביי האט דער ראש הקהל געמאלדן די גאר פריידיגע אנטוויקלונג, ווען אין די לעצטע צוויי טעג איז געשאפן געווארן אסטראנאמישע סכומים לטובת הקהילה והמוסדות, אריינגערעכנט עטליכע נדבות פון איבער א מיליאן דאללער יעדע איינס און אפילו מער.
אצינד גרייטן זיך די עסקני הקהילה ארויפצושארן די ארבל און ערלעדיגן אלע נויטיגע הכנות לקראת דעם געהויבענעם יום טוב יום הקדוש וואס דער רבי שליט"א וועט פראווענען בקרית מלך רב, די בוי ארבעט ביים ביהמ"ד גייט ווייטער אן אין פולן שוואונג צו גענצליך פארענדיגן דעם בנין לקראת די ימים הנוראים הבעל"ט, און דאס פארדינגען זיצן וועט זיך אנהייבן אין די נאנטע טעג בעז"ה.
