ווי יאר יערליך הייבט זיך אן אין די טעג די סדרי קבלת קהל, וואו די חסידים גייען אריין זיך מזכיר זיין ביי זייערע רבי'ס להיזכר לטובה מיט א כתיבה וחתימה טובה כנהוג מקדמת דנא, און ביי פילע חסידישע הויפן ווערט געמאלדן ספעציעלע מעלדונגען און טוישונגען איבער די זמני קבלת קהל.
קומענדיגע וואך וועלן מיר בעז"ה ווייטער ממשיך זיין צו ברענגען פון נאך חסידישע הויפן.
סאטמאר: נייע סדר פאר קבלת קהל
ווי שוין באריכטעט איז איינגעפירט געווארן א נייע סדר פון קבלת קהל בביתו נאוה קודש פון כ"ק אדמו"ר מסאטמאר שליט"א מיט א ספעציעלע שנעלע ליניע פאר די וואס ווילן דורכגיין אויף א שנעלע פארנעם. די נייע סדר לויטעט אז די ערשטע פאר שעה פון קבלת קהל איז געווידמעט פאר די חסידים וואס ווילן אדורכגיין מיט שנעלע קוויטלעך, נאר מענער אין א נאכאנאנדע שורה איינער נאכן צווייטן, און שפעטער ביינאכט איז די געווענליכע קבלת קהל, חסידים מיט די משפחות, שאלות און הזכרות, עלטערע אידן און אזוי ווייטער.
די נייע סדר גייט אן דורכאויס אלע טעג פון חודש אלול וואס דער רבי פראוועט בביתו נאוה קודש אין קרית יואל, און אזוי אויך אין די אנדערע טעג וואס דער רבי פראוועט אין אנדערע שטעט. יעדן דינסטאג אין חודש אלול וועט דער רבי ווי געווענליך אויפנעמען די חסידים מיט קוויטלעך בביתו נאוה קודש אין וויליאמסבורג, זונטאג פרשת כי תצא בבית מדרשו אין מאנסי, און מיטוואך פרשת כי תבוא בבית מדרשו אין בארא פארק.
סקווירא: נייע פליגל ווערט באנייעט פאר קבלת קהל
נעבן ביתו נאוה קודש פון כ"ק אדמו"ר מסקווירא שליט"א איז געבויעט געווארן א נייע פליגל דורכאויס די לעצטערע חדשים, און יעצט אין חודש אלול וועט עס צום ערשטן מאל באנייעט ווערן, צו פארגרינגערן פאר די פילע חסידים וואס קומען זיך פראווענען ביים רבי'ן לקראת די הייליגע טעג. קבלת קהל אין סקווירא וועט זיך דאס יאר אנהייבן זייער שפעט, הערשט נאך די ימי השמחה די שבע ברכות ביים רבינ'ס הויף, וואס ענדיגט זיך הערשט זונטאג פרשת כי תבוא.
וויזניץ: פארנומענע ימי השמחה אין חודש אלול
בחצר הקודש וויזניץ האט זיך שוין אנגעהויבן די סדרי קבלת קהל דעם אנהייב וואך, נאך וואס דורכאויס די קומענדיגע וואכן פון חודש אלול וועט זיין פארנומענע ימי השמחה, איין חתונה פונעם רבינ'ס אור אייניקל וואס קומט פאר קומענדיגע וואך אין שיכון סקווירא, און ווי באריכטעט פארט דער רבי ארויס אויף א בליץ באזוך קיין ניו יארק צו באשיינען די שמחה, און א וואך דערויף קומט פאר נאך א חתונה במעון הקודש פונעם רבי'ן אין ביהמ"ד הגדול אין קרית וויזניץ בני ברק.
דעם מאנטאג האט דער רבי געפראוועט די חסידים אין די בליענדע ישוב פון חסידי וויזניץ אין עפולה, מארגן מיטוואך וועט דער רבי אנקומען קיין אלעד און אויפנעמען די ארטיגע חסידים לקראת די הייליגע טעג.
סאטמאר: קליינע קינדער נאר אין די באשטימטע שעה
מטעם ביתו נאוה קודש פון כ"ק אדמו"ר מסאטמאר שליט"א איז געמאלדן געווארן די סדרי קבלת קהל אין אלע שטעט, מיט א ספעציעלע בקשה אז די וואס קומען מיט קליינע קינדער זאלן בלויז קומען צווישן זעקס און זיבן אזייגער נאכמיטאג.
מאנטאג פרשת כי תצא וועט דער רבי אויפנעמען די חסידים בביתו נאוה קודש אין קרית יטב לב אין בלומינגבורג, מאנטאג דינסטאג און מיטוואך פרשת נצבים וילך אין קרית יואל, אין שטוב פון הנגיד החסיד ר' מענדיל שווימער הי"ו ראש הקהל, מאנטאג יום ב' דסליחות אין מאנסי אין שטוב פון הנגיד החסיד ר' אברהם שלום מענדלאוויטש הי"ו ראש הקהל, דינסטאג בין כסא לעשור אין בארא פארק בבית מדרשו, און אלע אנדערע טעג בביתו נאוה קודש אין וויליאמסבורג.
צאנז: קבלת קהל אין אלע שטעט
כ"ק אדמו"ר מצאנז שליט"א וועט ארומפארן צו אלע שטעט ווי יאר יערליך, אויפנעמען די חסידים מיט קוויטלעך אין די בתי מדרשים דחסידי צאנז, זונטאג כי תצא וועט דער רבי זיין אין אלטשטאט צפת, מאנטאג כי תצא וועט דער רבי זיין אין חיפה, דינסטאג כי תצא אין קרית צאנז טבריה, זונטאג כי תבוא אין אלעד, פאר די חסידים פון אלעד, פתח תקוה, און מודיעין עילית.
מאנטאג כי תבוא וועט דער רבי זיין אין בית שמש, דינסטאג כי תבוא אין ביתר, זונטאג נצבים וילך אין בני ברק פאר די חסידים פון בני ברק און אשדוד, און דינסטאג נצבים וילך אין קרית צאנז ירושלים.
סאדיגורא: קבלת קהל לויט די משפחה נעמען
פון בית כ"ק אדמו"ר מסאדיגורא שליט"א איז געמאלדן געווארן אז די סדרי קבלת קהל בביתו נאוה קודש אין בני ברק וועט זיין איינגעטיילט לויט די משפחה נעמען, די וואס זייער נאמען הייבט זיך אן מיט די אותיות פון א' ביז כ', וועלן אריינגיין דעם מיטוואך ראש חודש אלול, די וואס די נעמען הייבט זיך אן מיט ל' מ' נ' און ס' וועלן אריינגיין קומענדיגן מאנטאג כי תצא, און די וואס זייער נאמען הייבט זיך אן מיט די אותיות פון ע' ביז ש', וועלן אריינגיין קומענדיגן מיטוואך פרשת כי תצא.
דורכאויס די וואך פון פרשת כי תבוא וועט דער רבי אנקומען צו עטליכע שטעט אויפצונעמען די ארטיגע חסידים מיט קוויטלעך, מאנטאג אין ביתר, דינסטאג אין ירושלים, מיטוואך אין מודיעין עילית, און דאנערשטאג אין תל אביב.
ערלוי: קבלת קהל נאר ביים רבי'ן אין שטוב
פון בית כ"ק אדמו"ר מערלוי שליט"א איז געמאלדן געווארן, אז אנדערש ווי יעדעס יאר ווען דער רבי פארט ארום אין אלע שטעט אין ארץ ישראל אויפצונעמען די חסידים מיט קוויטלעך לקראת די ימים הנוראים, וועט קבלת קהל דאס יאר זיין נאר בביתו נאוה קודש פונעם רבי'ן אין די קטמון געגנט אין ירושלים, צוליב דעם רבינ'ס שוואכע געזונט צושטאנד, נאכן ליידן א שווערע סטראוק פריער אין יאר ה"י.
